LECTURAS MIÉRCOLES SEGUNDO DE PASCUA

LECTURAS MIÉRCOLES SEGUNDO DE PASCUA

Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ háicha    5, 17-26

Pa’i guasu ha saduséokuérava oĩva hendive, ipochy eterei hikuái, ipojái apóstolkuérare ha omoinge koty ypytũ opavavépe guarãvape. Tupä Ñandejára remimbou katu oipe’a pyhare pe koty ypytũ rokẽ ha oguenohẽ ichupekuéra, he’ívo: “Tapeho, ha ñembo’yhápe Tupaópe pemoerakuã opavavépe ko ñe’ẽ jeikove rehegua.” Upe ohendu haguéicha, oike hikuái ko’ẽmbávo Tupaópe ha oñepyrũ oporombo’e.

Upérõ pa’i guasu ha umi oĩva hendive ohenói hikuái opa Israel moakãhára pe ñemboaty guasúpe, ha omondo koty ypytũme apóstol kuéra píari. Umi ñorairõhára oguahẽvo koty ypytũme katu ndojuhúi ichupekuéra. Upérõ ou jevy hikuái, he’ívo: Rojuhu koty ypytü oñemboty porã ha ñorairõhara kuéra oï joa okẽ nguéra renondépe. Roipe’ávo katu ndorojuhúi avavépe.

Ohendúvo Tupao pegua ñorairõharakuéra ruvicha ha pa’i ruvichakuéra oporandu joa ojupe mba’épepa opáta upéva. Upérõ oguahẽ peteĩ he’íva ichupekuéra: Umi peẽ pemoinge va’ekue koty ypytũme oime hikuái Tupaópe oporombo’e.

Ñorairõharakuéra ruvicha iñorairõhárakuéra reheve oho ipiári, ha ndopokói hese kuéra okyhyjégui umi tetãgua omboitárõ guarã ichupekuéra.

Tupã Ñandejára Ñe’ẽ.

SALMO ÑEMBOHOVÁI 33, 2-9

Opavave: Tupã Ñandejára ombovy’a che rekove.

O bien:

Aleluia

Amomba’e guasúta opa ára Tupã Ñandejárape, ichupe aropurahéita tapiaite.

Tupã Ñandejára ombovy’a che rekove.

Imboriahúva tohendu ha tovy’a! O.

Oñondive ñamomba’e guasu Tupã Ñandejárape,

héra jaropurahéi oñondivepa.

Tupã Ñandejárape añembo’e, ha’e che rendu,

ha oipe’apa che hegui umi mba’e che mongyhyjéva. O.

Umi Tupã Ñandejára rehe ojeroviáva vy’águi ojajaipáne,

ha hova noñomi chéne ñemotĩgui.

Che, tekove poriahu, Tupã Ñandejárape añembo’e.

Ha’e, che rendu ha che pe’a jejopy vaígui. O.

Tupã Ñandejára remimbou oñangareko ha oguenohẽ

jejopy vaígui opa umi hese ojeroviávape.

Peha’ã ha pehecha Tupã Ñandejára imba’e porãha.

Ovy’a rasa upe hese ojeroviáva. O.

ALELUIA  Jn. 3, 16

Aleluia.

Tupã Ñandejára ohayhu eterei yvypórape, ome’ẽ hesehápe Ita’ýra peteĩete; maymave ogueroviáva ichupe

oreko Tekove ijapyra’ÿva.

Aleluia.

EVANGELIO

Marandu porã Ñandejára Jesucristo rekove ha hemimbo’e San Juan omombe’u háicha   3, 16-21

Upe ramo Jesús he’i: Tupã ohayhu etereígui opa yvypórape, ome’ẽ va’ekue Ta’ýra peteĩete, ani haguã omano umi hese ojeroviáva, oikove haguã uvei opa ára. Tupã Ñandejára niko nomboúi Ta’ýra yvy ári ohundi haguã yvypórape. Ombou ichupe, ha’e rupi oipysyrõ haguã yvypóra kuérape.

Pe ojeroviáva Tupã Ra’ýre noñe hundíri. Pe ojerovia’ỹva katu oñehundíma, ojerovia’ỹ haguére Tupã Ra’ýre. Ha kóicha rupi Tupã ohundi umi ojerovia’ỹvape: Pe tesapeha niko ou ko yvy ári, yvypóra kuéra katu hembiapo vaígui, oikoseve pytũmbýpe oikove rangue ára sakãme. Mayma hembiapo vaíva ndohayhúi añetegua, ha noñemo’aguĩri añetépe ojeikohápe ani haguã ojehecha hembiapo vaikue.

Umi oikóva Tupã Ñandejára oipota háicha katu oñemoaguĩ ojehecha haguã hesekuéra oikoha Tupã Ñandejára oipota háicha.

Ñandejára Jesucristo Ñe’ẽ.