MIÉRCOLES SEMANA XI TO

Ko’ágä   ñahendúta Tupã Ñandejára ñe’ẽReyes aranduka mokõihápe oĩ háicha                                             

   2, 1. 6-14

Oguahẽvo pe ára Tupä Ñandejára ogueraha haguã Elías yvágape peteĩ yvytu ratãme, Elías ha Eliseo osẽ Guilgálgui.

Upéi he’i ichupe Elías: Epyta ko’ápe, Tupä Ñandejára che mondógui Jordánpe.

Eliseo katu he’i ichupe: Tupä Ñandejára rehe ha nde rehe voi ha’e ndéve ndoroheja mo’ãiha ne año.

Upérõ oho mokõivéva, ha 50 maranduhára oguahẽ ha opyta mombyrymi hovái kuéra; Elías ha Eliseo katu opyta y Jordán rembe’ýpe. Upérõ Elías oipe’a ijahoja, ombyapakua ha oinupã pe y. Pe y oñemboja’o, ha mokõive ohasa pe ysyry guasu mbyte rupi, yvy rupi ramo guáicha. Ohasa rire, Elías he’i Eliséope: Mba’épa reipota ajapo nde rehe ajereraha mboyve nde ypýgui.

Eliseo he’i ichupe: Aipota reme’ẽ chéve mokõi nde espíritu pehẽngue .

Elías he’i ichupe: Namichĩri pe rejeruréva. Che recha ramo ajererahávo nde hegui, rerekóta. Ýrõ, noñeme’ẽ mo’ãi ndéve.

Ha’e kuéra oguata ha oñe’ẽ aja oñondive, upéicha háguinte ou sapy’a peteĩ kárro tata, kavaju tata reheve avei, oipe’áva ichupe kuéra ojuehegui ha Elías ojehupi yvágape peteĩ yvytu ratãme. Ohechávo upéva Eliseo osapukái: “Che ru, che ru, nde va’ekue Israélpe guarã ñorairõhára aty mbaretéicha!”

Upe rire ndohechavéi Elíaspe.

Upérõ Eliseo omondoro ijao. Upéi ohupi pe ahoja ho’a va’ekue Elíasgui, oho jevy Jordánpe ha opyta hembe’ýpe, upéi oinupã pe y upe ahojápe ha he’i: “Mamo piko oĩ Tupã Elías Jára?”

Oinupã vove upe y, oñemboja’o mokõi hendápe ha Eliseo ohasa jevy pe ysyry rupi.

Tupã Ñandejára Ñe’ẽ.

SALMO ÑEMBOHOVÁI   30, 20-21. 24

R. Pene mbarete va’erã peha’ãrovo Tupä Ñandejárape.

Tupä Ñandejára, tuicha ite niko upe ne mborayhu,

rehechaukáva maymáva rovake umi nde rehe ojeroviáva ha

ne rendápe oguahẽvape añónte. R.

Nde ypýpe remboja ha remo’ã ichupekuéra

ani haguãtei hesekuéra mba’eve ojapo

umi pokarẽme oha’ãva ichupekuéra.

Nde róga guýpe remo’ã umi hesekuéra oñe’ẽ reívagui. R.

Pehayhu Tupä Ñandejárape peẽ hese pejeroviáva.

Ha’e oipytyvõ umi hese ojeroviávape,

ha ojahéi umi oñembo tuichasévape.

¡Ta pene mbaretéke peë peha’aröva Tupä Ñandejárape! R.

ALELUIA Jn 14, 23

Aleluia.

Ñandejára Jesucristo he’i:

“Pe che rayhúva nomboykemo’äi che ñe’ë,

che Ru ohayhúta ichupe rohóta hendápe”.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Mateo omombe’u háicha. Pejapysaka porãtapa hese?                                              6, 1- 6. 16-18

Upe ramo Jesús he’i hemimbo’ekuérape:

Pejapóvo oimeraẽ mba’e Tupã Ñandejárape pemomba’e guasu haguã ani pejapo opavave rovake pejechauka haguã. Upéicha pejapo ramo pende Ru oĩva yvágape nomoengoviái chéne peẽme mba’evépe.

Upévare, peipytyvõ ramo oikotevẽvape ani pemoherakuã opa rupi, ojapo háicha umi hova mokõiva umi tupaoha rupi, térã umi okaháre.

Ha’e kuéra péicha ojapo oñeñe’ẽ porã haguã hese kuéra. Añetehápe ha’e peẽme, ichupe kuéra niko oñemoengoviapáma oñemoengovia va’erã. Peẽ peipytyvõ ramo oikotevévape, ani peheja oikuaa pende rapicha pehayhuvéva. Kirirĩháme pejapo, ha péicha pende Ru ohecháva mba’épa pejapo kirirĩháme, omoengoviáta peẽme pene rembiapokue.

Peẽ peñembo’e jave, ani peñembo’e umi hova mokõi vaicha. Ha’e kuéra niko ñembo’yhápe oñembo’e umi judío kuéra tupao rupi, térã umi tape ojuasaha rupi ojehechauka haguã opavavépe. Añetehápe ha’e peẽme, ichupe kuéra niko oñemoengoviapáma oñemoengovia va’erã.

Peẽ peñembo’éta vove katu, peike pende kotýpe, pemboty pene rokẽ, ha peñembo’e pende Rúpe pene añoháme. Ha pende Ru ohecháva mba’épa pejapo pene añoháme, omoengoviáta peẽme pene rembiapokue.

Ndape’úi jave mba’eve Tupã Ñandejárape pemomba’e guasu haguã, ani peñembohovasy umi hova mokõi vaicha. Ha’e kuéra niko péicha ojapo ojechauka haguã ndo’úi jave hína mba’eve.

Añetehápe ha’e peẽme, ichupe kuéra niko oñemoengoviapáma oñemoengovia va’erã. Peẽ ndape’úi jave mba’eve Tupã Ñandejárape pemomba’e guasu haguã, pejovahéi ha peñakãkarãi, ani haguã avave ohechakuaa ndere’uiha mba’eve Tupã Ñandejáarape remomba’e guasu haguã. Nde Ru añónte ohecháta pe ne añoháme rejapóva. Ha’e ohecha kuaáta ndéve ha omoengoviáta ndéve ne rembiapokue.

Ñandejára Jesucristo Ñe’ẽ