Ñahendu Jesús Ñe’ẽ. Domingo 13ª Tiempo Durante el Año

Escucha el evangelio y la reflexión en: https://youtu.be/sf95nVEdBH4?si=CeaqFv59iZ9Z7edB

Domingo 13 TDA Ciclo B

Marcos 5, 21 – 43

Ohasa rire Lágo Galiléa mboypýri, Jesús opyta pe y rembe’ýpe. Heta jeýma umi ijatýva ijerére. Upévo, oguãhẽ hendápe Jáiro. Ha’e niko pe omyakãva pe tupao upépe. Ha ohechávo Jesúspe oñesũ henondépe, ha ojerure asy chupe: — Che rajy niko oime omano potaite.

Ejúna emoĩ nde po hese. Tokuera ha toikove. Ha Jesús oho hendive. Heta avei umi omoirũva chupe kuéra. Ha ojopypa chupe hikuái opáguio. Umíva apytépe oĩ peteĩ kuña hasýva ojapóma 12 áño. Huguy py’ỹiva jepi ha ikatu’ỹva okuera. Hetáma ohasa asy… Oñemopa’ũ-pa’ũ umi ohóva apytépe Jesús gotyo.

Oñembojase hese hapykue guio opoko haguã ijaóre. He’i niko pe kuña ipy’apýpe “Ijaórente jepe apokórõ, akueráne.” Ha opokóvo Jesús aóre, upepete pe huguyha opyta ha oñandu hetepýpe okueraha imba’asýgui. Jesús ave oñandu upévo osẽ hague chugui pu’aka omongueráva. Ojere oma’ẽ opavavére ha oporandu: — Mávaiko opoko che aóre…

Pe kuña katu oikuaa porã okueráma hague. Ha kyhyjepópe oñemboja Jesús rendápe, oñesũ henondépe ha omombe’upa chupe pe ojehu vaekue. Jesús he’i chupe:— Che rajy, Ñandejárare rejerovia haguére rekuera. Tereho py’aguapýpe ha anivéma reiko asy.

Jesús oñe’ẽ jave gueteri hína, oguãhẽ peteĩ Jáiro rogaygua, ha he’i chupe: — Omanóma nde rajy. Anivéma emyangekói mbo’ehárape.

Jesús katu opena’ỹre pe oje’évare, he’i Jáirope:— Anítei rejepy’apy. Ejeroviánte che rehe. Ha ohótavo Jáiro rógape, Jesús ndohejái avavépe oho hendive. Pedro, Santiágo ha tyvýra Juánpe añónte ogueraha hendive. Oguãhẽvo Jáiro rógape ojuhu hasẽmba joáva upépe.

Oike ha he’i chupe kuéra: — Mba’éreiko pene rasẽ ha pejahe’o péicha. Ko mitakuña niko nomanói, okénte hína.

Oĩ katu oñembohorýva hese. Ha’e katu omosẽmba opavavépe. Ha itúva, isy ha idisípulo kuéra ndive oike pe mitakuña oĩháme. Ipojái ipóre ha he’i chupe: — Talitá cum (he’iséva: “Mitakuña epu’ã.”).

Upévo pe mitakuña, oguerekóva 12 áño, opu’ã ha oguata. Ha opavave opondera joa. Jesús katu he’i chupekuéra ani haguã omombe’u avavépe. Upéi he’i túva ha sýpe: — Pemongaru pe mitã.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Apokomi guive hese ovaléma. Péicha he’i ipy’ápe pe kuña poriahu naipohãvéigui oñembojáva Hesúre. Ha péicha nunga avei he’i pe mitãkuña ru Hesúpe: Ejúna. Epokomíntena hese ha okuerátama.

He’i ningo Papa Francisco: “Che aporandu pe’ẽme, peñandúpa peikotevẽha Ñandejára penepohãno. Oime raẽ mba’egui, pende pekádo, pende problema. Ha peñandúramo péva, pejeroviápa Hesúre. Penemonguera haguã Hesu tekotevẽ hína peñandu pekueraseha añete ha pejeroviaha hese.” (Ángelus 1 julio 2018).

ÑAÑEMBO’E OÑONDIVE

Ñandejára Hesukrísto, emonguerava’ekue umi naipohãvéigui nerendápe oñembojáva ojerure asy, tuicha ojeroviágui nde rehe. Emongakuaa ore jerovia roñemboja haguã nde rehe tesãi rekávo. Amén.

Pa’i Alberto Luna.