Ñahendu Jesús Ñe’ẽ. Domingo 2º Tiempo Durante el Año

Escucha el evangelio y la reflexión en: https://youtu.be/QYBsQbLrnJs

Domingo 2º Tiempo Durante el Año

Juan 2, 1 – 11

Upe ramo, mbohapy ára rire niko oiko peteĩ ñemenda Caná puéblope, opytáva Galiléape. Jesús sy oĩ ra’e hína upépe. Jesús ha idisípulokuérape avei oñekonvida oho haguã. Upéi katu opa sapy’a víno. Upépe Jesús sy oñemboja hendápe ha he’i chupe:—Opa niko chuguikuéra ivíno.

Jesús he’i chupe: — Che sy, mba’éreiko chéve eju ere péicha. Ne’ĩra gueteri niko oguãhẽ pe ára aikuaaukávo opavavépe mávapa che.
Isy katu he’i umi tembiguáipe: — Pejapo he’íva peẽme.

Oĩ hína upépe 6 kambuchi y ryru, judíokuéra oiporúva oñemopotĩ haguã hamba’e.

Umi kambuchípe ija amo 100 lítrokuéra rupi. Jesús he’i umi tembiguáipe: — Pemyenyhẽ ýgui umi kambuchi. Ha hembére omyenyhẽ hikuái.

Upéi katu Jesús he’i chupekuéra:— Penohẽ michĩmi ha peraha petanteauka pende kapatápe. Ha péicha ojapo hikuái. Pe kapata otantea pe víno ýgui oiko vaekue, oikuaa’ỹre ha’e moõguipa osẽ.

Umi tembiguái katu niko oikuaa, ha’e kuéra voi oguenohẽ haguére pe kambuchígui. Upéi, pe kapata ohenói pe omendávape, ha he’i chupe:— Opárupi niko víno iporãvéva raẽ oñeme’ẽ oje’u haguã.

Oje’u heta rire ae oñeme’ẽ pe naiporãmbáiva. Nde katu niko reheja pe iporãvéva ko ipahávo. Kóva va’ekue pe milágro tenondetegua Jesús ojapo va’ekue. Ha Canáme kóicha ohechauka ikatupyryha, ha idisípulokuéra ojerovia hese.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Kuña ha kuimba’e omendáramo oiko vy’a guasu. Heta oñekonvida. Péicha avei umi ombojoajúva hekove Ñandejárare. Hermana ojapóramo vóto, seminarista oikóramo chugui pa’i, karaígui oikóramo diákono.

Oiko ñembo’e guasu ojeguapáva, heta ijaty opáguio, ikyre’ỹmba opavave. Ndaipori mo’ãi vaicha ñande jokóva ñamohu’ã haguã pe
ñamoñepyrũva. Upéi katu tenonderãmive, ne’irãitéramo guarã oĩma omenda va’ekue ojuejáva. Ñahendu avei hermana, pa’i ha obíspo jepe ojehejáva. Ha’eteku pe ñanembye-tia’ete va’ekue ou nahe’ẽvéi ñandéve. Opa la víno ñanembovy’áva.

Ha péicha che reindy ha nde che irũ oguahẽvo ñandéve jahejapase ha ñasẽ jaha, tekotevẽ ñandepojái avei Tupãsýre, tohenói imemby Jesús, ha’ekuéra tomohe’ẽ jey ñandéve ñande rekove yréi, ñamboguata haguã ñane compromiso ñanekane’õ’ỹre.

ÑAÑEMBO’E OÑONDIVE

Ñandejára Jesucristo aníkena eheja opa rei orehegui mborayhu ha vy’a. Ejúkena nde sy María ndive pemohe’ẽ ore rekove ore retia’e haguã opa araite nde rapére. Amén.

Pa’i Alberto Luna.