Ñahendu Jesús Ñe’ẽ. Domingo 3º Tiempo Durante el Año

Escucha el evangelio y la reflexión en: https://youtu.be/9uEdWG_Hxdk

Domingo 3º Tiempo Durante el Año Ciclo C Lucas 1,1-4; 4,14-21

Hetáma niko umi oñeha’ã va’ekue omoĩ kuatiápe opa umi mba’e ojehu va’ekue ore apytépe. Umíva umi mba’e omombe’u oréve umi Jesús ndive oiko va’ekue, ha ohecha va’ekue umi mba’e ojapóva iñepyrũmby guive.

Che avei, karai Teófilo, añamindu’u heta rire ko’ã mba’ére, hi’ãnte chéve ambohysýi ndéve kuatiápe ko’ã mba’e. Péicharõ reikuaa porãta añetépa hína umi mba’e ndéve oñemombe’u va’ekue.

Jesús oho jey Galiléape, henyhẽ Espíritu Sántogui. Ombo’e oikóvo tupao rupi ha maymáva oguerohory chupe. Opa rupi herakuã. Ha oho Nazarétpe, upe okakuaa haguépe. Ha pytu’uha árape, ojapo háicha jepi voi, oho tupaópe.

Oñembo’y omoñe’ẽ haguã Ñandejára Ñe’ẽ, ha ome’ẽ chupe hikuái proféta Isaías kuatia. Ha oipe’ávo ojuhu he’ihápe: Ñandejára Espíritu ou chéve. Che poravo haguére araha haguã marandu porã opa imboriahúvape.

Chéve che mbou aipe’ávo jejopýgui umi préso oĩvape, ahesape’ávo umi ohecha’ỹvape, ha ajorávo opa ohasa asýva. Ha amyerakuã haguã «Oguãhẽmaha ára Ñandejára ñande salva haguã».

Upéi katu Jesús omboty pe kuatia, ombohasa jey pe ome’ẽ va’ekuépe chupe, ha oguapy. Ha oñemañamba joa hese. Upéi oñe’ẽ ha he’i:— Péina ko’ágã ou ojehu upe pehendu va’ekue.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oime niko mba’e porã ñande jajapo va’erãva ha ndajajapói, ja’e va’erãva ha ndaja’éi. Ñambohasa jaikóvo. Ja’e: ‘Ko’ẽramo ajapóne, ágãnte ha’éne.’ Ha péicha jaheja jahávo jajapo’ỹre. Heta mba’e avei jahecha ñane comunidápe, ñande vállepe, ñane retãme.

Jaipotáva oiko, tekotevẽva jajapo, ha ñaha’arõ vaicha ou ambue ñande rapicha ojapo. Jesús oñepyrũvo hembiapo ha’ete voi oho rei hese. Oporombo’e, omyerakuã Ñandejára ñe’ẽ, oipohano hasýva. Noha’arõi avavépe. Espíritu Santo omomýi ichupe ani haguã okirirĩ, ani haguã oñembotavy ha ombohasa.

Ndaha’éi ko’ẽrorã, ndaha’éi hína ambue ojapótava. Espíritu Santo oñanduka ichupe ko’ãgaite tekotevẽha ha’ete voi omýi. Ha Jesús noha’arõi, noñembotavýi, ha ojepoi paite pe Ñandejára rembiapópe ipy’aite guive.

Mba’épa hína che reindy ha nde che irũ, Ñandejára oñandukáva ndéve ko’ãga ha’eha upe ára emýi ha eguata haguã. Mba’épa tekotevẽ ko’ãga eñepyrũ. Jesús he’i: ko’ãga ha’e ára mboriahu sã ñamondoho haguã, jajorávo umi oiko asýva. Ko’ãga ha’e ára ñañepyrũ haguã ñamoañete tekojoja opavavépe guarã.

ÑAÑEMBO’E OÑONDIVE

Ñandejára Jesucristo, nde niko eju va’ekue mboriahu ha oiko asýva rendápe. Ore pytyvõ míkena ore avei romoguahẽ haguã ichupe kuéra Ñandejára mborayhu. Amén.

Pa’i Alberto Luna.