Ñahendu Hesu. Domingo Semana 16a TO

Escucha el evangelio y la reflexión en: https://youtu.be/ANTv-wYybNo

Domingo 16^a TO Ciclo A                                                                                             

                                         Mateo 13, 24 – 30.

UpérõJesús omombe’u opavavépe kóva ko káso. Ñandejára Rréino yvagapegua niko ojogua ku karaípe onotỹka vaekue ikokuépe trígo ra’ỹi porã. Peteĩ pyharépe katu, oke aja, oike ikokuépe hese ija’e’ỹva ha omosarambi hemitỹngue apytépe ñana vai. Upéi osẽ oho.

Pe trígo opu’ã ha upéicha avei pe ñana. Umi óga jára rembiguái ohechávo pe ojehúva, oho hendápe ha he’i chupe hikuái: “Karai, trígo ra’ỹi porã niko ku reñotỹka vaekue nde kokuépe. Mba’éicha haguã piko osẽ ijapytépe ñana.” Pe óga jára he’i chupe kuéra: “Oime vaerã hína che rehe ija’e’ỹva ojapo ra’e.” Upépe umi hembiguái he’i chupe: “Reipota piko roho romondoro umi ñana.” Ha’e katu he’i chupe kuéra: “Nahániri. Pehejánte, ani ágã ñamondorokuévo umi ñana, ñamondoro avei pe trígo. Jahejánte tokakuaa oñondive ha tahi’aju. Ágã ñamono’õta vove, ñamondoro raẽta pe ñana ha jajokua aty-atýpe ha jahapy. Upe rire ae ñambyatýne pe trígo ha ñambohyru.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Peteĩ árape pe múndo ojeapóramo guare ndaje raka’e Ñandejára ojapo peteĩ pykasu morotĩ asy ha opoi ichugui ovevete. Ha Aña oma’ẽ hína ra’e hese mombyrýgui, okañy hápe. Ha ojaposetéma avei ha’e peichagua hymbarã. Ha oho voi pya’e oheka ñai’ũ, ojapo la ojapóva, ha omoĩma voi katuitatakuápe. Ha la Aña tatakua ningo haku eterei rasa, ha okái paite chugui, ha osẽ chupe amo ipahápe peteĩ mbopi.

Kóva ko káso ojogua pe Hesu omombe’úva ñandéve. Mba’éichapa pe semílla Ñandejáraoñemitỹ vaekue ko múndo apére ha ñande rekovépe iporãmbaite, ha oñotỹ hi’a porãhaguãicha avei ñandéve, ñande rayhúgui. Ha omombe’u Hesu oike hague ndaje raka’e pyhare, kañy hápe, Ñandejára kontrário, ndoikuaaséiva ichugui mba’eve ha ombyaiséva hembiapo, oñembojaraséva ikokuégui. Ha upéva ou raka’e oity isemílla vaiko yvy tuichakue apére, ñane retãme, ñande rógape, ha ñande pype voi.

Ha oho haguéicha umi kokuépe omba’apóva osapukái pe kokue járape, jaha avei ñande jasapukái Ñandejárape, mba’éicha rupípa oheja oiko ñande rehe ko’ãmba’e vai. Mba’e mba’e piko rojapo ivaietéva ãichagua ombou haguãñane akãári. Ha pya’éke toipe’a ñande hégui.

Ha he’i Hesu, pe kokue jára he’i ojehe’a iterei jepéma hague pe iporãha ivaíva. Jatrosapaséramo peivaíva ñande rekovégui jatrosataha avei pe iporãva hendive. Ñane pasiénsiata mante nde che irũ ha che reindy, ñamboguata haguãñande rekove ñuatĩ apytépe, jaikuaa pype umi mba’e vai ñande kutu rasýva, ipahápe Ñandejára oipe’ataha ñande hegui, ha umiÑandejára semílla hi’a porãva ñande rekovépekatu opytataha opa ára guarãñandéve, ha umi ñande rapykuéri oúva peguarã.

ÑAÑEMBO’E OÑONDIVE

Ñandejára ore Ru, nde eñotỹ vaekue ore rekovépe nde semílla porã. Ore pytyvõmi kena ani haguãore aho’i haipu’aka ore rehe umi mba’e vai ojeréva ore rehe. Eme’ẽ oréve pu’aka ha embou oréve ore pytyvõva ore rembiapópe, hi’a porãite haguãore rekove. Amén.

Pa’i Alberto Luna.