Ñahendu Hesu. Tupãsy Santa María ára
1 enero, 2022Ñahendu Hesu. Lunes Epifanía rire
3 enero, 2022Escucha el evangelio y la reflexión en: https://youtu.be/ci3koJgAvvY
EPIFANÍA: Ñandejára ojehechauka
Mateo 2, 1 – 12
Jesús niko onase va’ekue Belénpe, Judéape. Herodes vaekue rréi upérõ. Oguãhẽ katu Jerusalénpe, kuarahy resẽ guio oúvo, mbohapy karai arandu. Oguãhẽmba riremínte oporandu hikuái upépe: — Moõiko oime pe mitã onase va’ekue hudíokuéra rréirã. Rohecha niko kuarahy resẽme mbyja chupe omohenondéva. Ha roju hína romomba’e guasu haguã chupe.
Herodes oikuaávo upéva ipy’a tarovaite. Ha opa Jerusalengua upéichante avei. Upémarõ, Herodes ombyatypa ijerére pa’i ruvichakuéra, ha umi hudíokuéra léi ombo’éva. Ha oporandu chupekuéra moõpa onase va’erã ra’e pe Mesías. Ha’ekuéra he’i chupe: — Belénpe, Judéape. Proféta niko oheja vaekue kuatiápe he’i ramo guare kóicha:
“Ha nde Belén reiméva Judápe, nane michĩvéi mba’eveichave ramo puéblokuéra apytépe upe tetãme. Ndehegui osẽta rréi oisãmbyhýtava che retã Israel.”
Upépe, Herodes ohenoika kañyháme umi karai arandúpe. Ha oporandu chupe kuéra araka’etépa ohecha ra’e hikuái pe mbyja. Upéi katu omondo chupekuéra Belénpe, he’ívo: — Tapeho peikuaa porã moõpa oĩ hína pe mitã. Pejuhu rire, peju pemombe’u chéve. Che ave ahase amomba’e guasu chupe.
Herodes oñe’ẽmba riremi, umi karai arandu osẽ oho. Ha pe mbyja ha’ekuéra ohecha va’ekue kuarahy resẽvo, oho henonderã. Upéi katu opyta pe óga pe mitã oĩha ári.
Umi karai arandu ohechávo moõpa opyta pe mbyja tuicha ovy’a. Oike hikuái pe ógape, ha upépe ohecha pe mitãmi, isy María ndive. Oñesũ ha omomba’e guasu chupe hikuái.
Upéi katu oguenohẽ ikarameguãgui óro, insiénso ha mírra ryakuã porã, ha ome’ẽ chupe. Ñandejára he’i rire chupe kuéra iképe ani haguã oho Herodes rendápe, osẽ oho hikuái hetãme ambue tape rupi.
Ñandejára Jesucristo ñe’ẽ.
ÑAMBOGUEJY ÑANDE REKOVÉPE
Pytũmbýpe apyta akañyete. Péicha niko sapy’ánte ojehu avei ñandéve ha ndajaikuái moõ gotyo pa jajapíta. Ha péicha avei Los Reyes mombyrýgui ou ramo guare oheka Jesús pe oñedesatinaite. Oguemi ichugui kuéra pe estrella ohechaukáva tape.
Mba’etekópa che reindy ha nde che irũ pe estrella ohechaukáva ndéve tape rejuhu haguã Jesús, María ha José pe. Noiméipa okañy mba’e nde hegui jerovia, ñembo’e, tupao, komunida rape. Ne mandu’ami kena Los Reyes rehe, ndoheja reíriva pe tape oñepyrũ va’ekue Ñandejára rérape. Okañy ramo jepe, okarkula ha ñeporandu randúpe jepe oho hese. Ojuhu peve Jesús pe, tuicha vy’a ha py’aguapýpe.
ÑAÑEMBO’E OÑONDIVE
Ñandejára, emboúva nde Ra’y opavavépe, iñarandu ha itavývape guarã. Ehesape ore rekove ha rokañy ramo ejuhuka oréve tape roguahẽ haguã Jesús, María ha José rendápe. Amén.
Pa’i Jasy.