Ñahendu Hesu. Jueves Semana 13a TO

Escucha el evangelio y la reflexión en: https://youtu.be/MG0Gbmi-eW8

Jueves Semana 13^a TO                                      

                             Mateo 9, 1 – 8.

Jesús ojupi peteĩ kanóape ha ohasa jey Lágo Galiléa mboypýri, upe ha’e oikoha gotyo. Upépe, ojereru hendápe tupápe peteĩ paralítiko. Ha Jesús ohechávo mba’éichapa ha’e kuéra ojerovia hese, he’i pe hasývape:

— Néike che ra’y. Nde pekádo ojeheja reíma ndéve.

Upépe, umi hudío kuéra léi ombo’eva he’i ipy’apýpe “He’i’ỹ vaerã niko he’i. Ha’e piko oimo’ã ha’e Ñandejaraha mba’e.” Jesús katu ohecha kuaa mba’épa he’i hína hikuái. He’i upémarõ chupe kuéra: — Mba’éreiko ivaíva pembojere hína pene akãme.

Mba’épa ndahasyive ja’e ko kuimba’épe “Ojeheja reíma ndéve nde pekádo”, térãpa “Epu’ã eguata”. Néi, ahechaukáta peẽme ko’ágã ko kuimba’e ikatuha oheja rei ipekádo oimeraẽvape ko yvy ári.

Ha upépe he’i pe paralítikope: — Epu’ã. Ehupi nde rupa ha tereho nde rógape.

Upepete pe paralítiko opu’ã, ha oho hógape. Ohechávo upéva hikuái, oñemondyipa.  Omomba’e guasu hikuái Ñandejárape ome’ẽ haguére yvypórape peichagua pu’aka.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

            Pe ñande rapicha hasýva niko oñeapytĩ hetépe ha ndaikatúi ijehegui. Oikotevẽ omoirũ vaerã chupe okuera peve, ha’eño ha ndorekói ramo ojevale haguã katu ijetu’u hendive. Tuicha oguapy hese ha sapy’ánte omokangy ñande rapicha. Ha pe hasýva oñembyasy ha nda’ipy’aguapýi ramo katu, hasypeve okuera. Orekóramo oñangarekóva hese, hetia’e ha ojerovia ramo katu, ombohasa porãve ha iñesperánsave okuerávo.

            Hesu oñembo’éva voínte ha oipohanóva hasývape ojeguerúva chupe. Ojeroviáva hese, ohovasa ha omoguahẽ chupe kuéra Ñandejára mborayhu. Tenonderã oheka pe hasýva oñandu Tupã oiporiahuvereko ha ohayhuha chupe. Ndaha’eiha hasýva Ñandejára ipochy haguére hendive. Umi judío kuéra niko he’íva umi hasýva oĩha péicha hembiapo vaikuére, Tupã ombojereha hi’ári pe ojapo vai vaekue. Upéva oipe’a haguã ipy’águi Hesu he’i pe kuimba’épe operdonaha ichupe hembiapo vaikue. Ombovevúi ha ombopy’aguapy haguã chupe, oipohano raẽ ipy’a ombohape haguã tesãi hetépe.

            Ñande rapicha hasýramo oikotevẽ ñamoirũ, jajepy’apy pohã, tembi’u, operación ha opa mba’ére. Ñambovevúi haguã chupe ijehasa asy, ñaha’ã ha jajapo va’erã upéva. Iporã avei jaheka oñondive tesãi rape ñande comunida peguarã, jareko centro de salud, doctor, enfermera, farmacia comunitaria ha mba’e. Jajeheka avei pohã ñanáre, medicina natural oñembohérava.  Opáichavo Hesu ñanemomandu’a tekotevẽha jajepy’apy avei ñande rapicha hasýva ipy’aguapy haguã, oñemombe’u, oreko haguã Ñandejára ñandy, unción de los enfermos, pa’i pórupi, ikatúramo. Péva ko ndaha’éi omanombotáva peguarã año, ikatu avei jajerure pa’ípe oimeraẽva hasýva peguarã.

            Mávapa che reindy ha nde che irũ, oime hína hasy katúva ne hénte kuéra apytépe, nde vesíno, nde comunida gua, ikatúva oikotevẽ ehami eñandu ha eipytyvõ.

Pa’i Alberto Luna.