Ñahendu Hesu. Lunes Semana 17a TO

Escucha el evangelio y la reflexión en: https://youtu.be/vOp27LZ6nKE

Lunes Semana 17^a TO           

                                             Mateo 13, 31 – 35.

Upérõ Jesús omombe’u kóva ko káso.Ñandejára Rréino yvagapegua niko ojogua ku mostása ra’ỹime oñeñotỹva kokuépe. Mostása ra’ỹigui michĩvéva niko ndaipóri, okakuaa rire katu, ijyvateve opa mba’e kokuépe opu’ãvagui. Yvyra mátaicha ijyvate haguyra kuéra ou ojaitypo hakãre.

Jesús omombe’uve uperire kóva ko káso. Ñandejára Rréino yvagapegua niko ojogua ku levadúrape kuñakarai ombojehe’áva 25 kílo hu’itĩme, ipahápe oúva ombovupaite.

Jesús oiporu káso ñemombe’u oñe’ẽ jave umi hénte kuéra ndive. Ha mba’eve nde’íri péicha ojapo’ỹre.  Péicha ou ojehu oiko haguã ku proféta he’i vaekue ojehutaha, he’i ramo guare: Káso ñemombe’u rupi aikuaaukáta chupe kuéra umi mba’e oĩva iñemimby Ñandejára ojapo ypy guive ko yvy.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

            Pe ñande rekove ha ñane rembiapo ára ko’ẽre jajapóva niko sapy’ánte ikatu ñañandu vyrésa vaicha. Ha’etéku mba’evérõ guáicha, ndahyapu guasúi, ndaipóri voi ohechakuaáva ñandéve, ndojekuaái vaicha hapykuere. Ñanrredánte ñandúicha ha mba’eve vaicha nañamboapu’ái jaikóvo. Upéicha avei ikatu ñañandu pe ñande jeguata ñande komunida, ñande kapílla ha ñande aty kuérape, ñane ñembo’e ha ñane rembiapo ñamboguatáva organisaciónpe jahekávo jeiko porãve, mba’eve guasu vaicha avei.

            Ñahendu angete Hesu okasea ha ombojoja Ñandejára Rréino peteĩ semilla’i michĩre, jepevérõ haimete ndojekuaáiva, ipahápe opu’ãva ichugui peteĩ yvyra máta kakuaa ikatuhápe ou opaichagua guyra ojaitypo. Upéi avei ombojoja pe cristiáno jeguata ha hembiapo ko ñane múndope, upe levadúra rehe, jepe michĩmínte oñemoĩ pe harína aty apytépe, upéva ombovupa ha ombotuicha. Upéicha avei umi tembiapo sa’i sa’i jajapóva ñane komunida, ñande kapílla, ñande rogapy ha ñande rekohápe, natekotevẽi katuete tuicha opoko haguã hetáre ha omongu’e haguã hetave tembiapo uperire, michĩ ramo jepe, upéva ombohape ha omopyenda hina hetave mba’e porã.

            Oimépa che reindy ha nde che irũ reñandu avei nde sapy’ánte sonséra itereiha upe rejapóva ha nderehodesevéima vyresáre. Umi tembiapo porã ñamoñepyrũva niko ñamohu’ã vaerã, he’i Ghandi, karai marangatu Indiagua. Michĩramo jepe, ani jahejarei. Ani ñane kane’õ térã ñane py’a kangy. Umi tembiapo sa’i sa’i rupive, ku levadúra ombovu háicha pe mása kirirĩ hápe, okakuaa hina avei ñande apytépe, ñañandu’ỹ ramo jepe, upe Ñandejára grásia heta peguarã.

Pa’i Alberto Luna.