Ñahendu Hesu. Lunes V Durante el Año

Escucha el evangelio y la reflexión en: https://youtu.be/f4N_HEd5dx4

Lunes 5. Durante el Año

Marcos 6, 53 – 56

Jesús ha idisípulo kuéra ohasa rire Lágo Galiléa mboypýri, oguãhẽ hikuái Genesarétpe. Ha pe y rembe’ýpe ojokua hikuái ikanóa. Oguejývo hikuái katu, umi upe rupi oikóva oikuaa Jesús oguãhẽ hague. Ha osẽmba oho hikuái opa rupi ogueru haguã hendápe opa umi hasýva.

Mamo ohohápe niko opáicha rei ojereru hendápe umi hasýva, hupápe jepeve. Ha péicha avei, mamo oguãhẽháme taha’e ógape térã pe ñúre rei, omoĩ hikuái umi hasýva hapépe. Ojerure chupe hikuái ijao rembe’yrénte opokomi haguã hikuái. Ha opa umi opokóva hese okuera.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Jaháramo hospitálpe jajuhu heta oha’arõva doctor oma’ẽmi hese. Ohóva ihéntekuéra ndive, ojepy’apy joáva hese. Oime avei umi oñepohanóva, oñenóva tupápe, oikéva operaciónpe. Oĩ omoirũva chupe ha opytáva hendive okuéra peve.

Oĩ avei heta hasýva ha ndaikatúiva ou hospitálpe, doctor rendápe, ndaikatúigui ou ijehegui. Térã katu ndaipórigui oguerúva chupe oñepohano haguã. Oĩ avei ndohóiva voi doctor rendápe oikuaágui upéi ojogua va’erãha pohã ha ndorekóigui hepyrã ndohóiete mandi voi.

Umíva ojeporeka pohã ñanáre, oho médicope ojehechauka, térã oheka oñembo’e va’erã hese.

Hesu oiko hárupi sa’i oĩ oporopohanóva ha heta oĩ mboriahu hasýva ndotopáiva omongueráva chupekuéra. Umíva ohendúvo Hesu outaha ivállepe, térã ohasataha tapére, osẽ ohuguaitĩ chupe, ojeroviágui hese. Ohechase chupe, ohenduse iñe’ẽ, oñemoaiguĩse chugui. Oipota Hesu opoko ha oñembo’emi hesekuéra. Oha’arõ Hesu oipohano chupekuéra imba’asýgui.

Ikatu hína ñande avei che reindy ha nde che irû jaikuaa hasy katúva, oñepohanóva ha ñoñepohanóiva ave. Ikatu avei ñande voi ñande rasy, ndaha’éi katuete mba’asy ñande rete rehegua. Ikatu hína mba’e asy ñane apytĩva ha vaípe ñande rekóva ñande py’ápe, añanembopy’a guapýiva.

Mba’éicha tamora’e ikatu jajeporekávo doctor, ha pohãre re tesãi rekávo, jajeporeka avei Hesúre. Jaha hendápe, ñañemoĩ hapépe, jaike mamo oime hápe ijatýva ohendu haguã iñe’ẽ ha oñembo’e haguã chupe.

Mba’éicha tamora’e ikatúne opoko ha’e ñande py’áre ha ñande jora ñane mba’asýgui. Tañane resãi ñande retépe ha taipiro’y ñane korasõ.

Pa’i Alberto Luna.