Ñahendu Hesu. Martes 18º Durante el Año

Escucha el evangelio y la reflexión en: https://youtu.be/CTqTpj_dEwQ

Martes 18º Durante el Año

Mateo 14, 22 – 36

Upérõ Jesús he’i idisípulokuérape pya’ete ojupi haguã kanóape ha ohasa haguã hikuái henonderã lágo mboypýri. Upe aja ha’e opytáta omondopa haguã opavavépe hógape. Ohopa rire hikuái, Jesús ojupi peteĩ sérro ru’ãme oñembo’e haguã ha’eño.

Pyhare oguãhẽvo, Jesús oĩ gueteri hína upépe ha’eño. Upe aja katu, pe kanóa oguãhẽma pe y
mbyte rupi. Ohuvãitĩ ohóvo hikuái yvytu, ha pe y pochy oñenupã pe kanóa tĩre.

Ko’ẽmbotávoma, oñemboja sapy’a Jesús hendápe kuéra, oguata oúvo y apére ra’e hína. Idisípulokuéra katu ohechávo oguatáva oúvo hína y apére, tuicha oñemondýi. Ha okyhyjégui osapukái: — Cháke póra.

Jesús katu oñe’ẽ chupekuéra, ha he’i: — Chénteko hína. Ani pekyhyje.

Upérõ Pedro osẽ he’i: — Mbo’ehára, nde ramo añete, eheja chéve taha ne rendápe y apére.

Jesús he’i chupe: — Eju.

Upépe, Pedro oguejy pe kanóagui ha oñepyrũ oguata pe y apére ohóvo Jesús rendápe.
Oñandúvo pe yvytu hatã oipeju katu okyhyje sapy’a, ha oñepyrũ oñapymi. Upépe osapukái: — Mbo’ehára, cháke ajahogátako.

Upévo Jesús ombohasa ichupe ipo, ha he’i chupe: — Rejerovia’iete piko ra’e che rehe.
Mba’éreiko reduda ha rekyhyje. Ha ojupívo mokõivéva pe kanóape, opi sapy’a pe yvytu.

Umi kanóape opyta va’ekue katu oñesũmba Jesús renondépe, ha he’i chupe: — Nde niko añete Ñandejára Ra’y ra’e.

Jesús ha idisípulokuéra ohasa Lágo Galiléa mboypýri ha oguãhẽ Genesarétpe. Umi upepegua oikuaávo Jesús oguãhẽ hague, omoherakuã hikuái opa rupi. Ha ojegueru hendápe opaichagua hasýva. Ojerure chupe hikuái ijao rembe’yrénte opokomi haguã. Ha opa umi opokóva hese okuera.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

“Ivaive japaro pyharégui”. He’i ningo peteĩ ñe’ẽ. Ha péicha nunga hína ojehu Hesu apóstolkuérape, oúva kanóape pyhare pyte, ojagarrávo ichupekuéra peteĩ torménta nde vaipa jepéva lágo mbytépe.

Ha péicha oiko sapy’ánte ñande rehe avei, che irũ ha che reindy. La ñande rekovemi -ñande kanoa’i- ha’ete ku ohótava ñande hegui amo huguaitépe.

Pe y niko nahakãi, ha ndajajuhúi mamópa ñandepojáita. Ha San Pedro hína la ohechakuaáva upe oime vaive aja Ñandejára oimeha ijykére. Ha ojerure ichupe oguata haguã pe y pochy ári.

Oma’ẽ vove Hesu rehe, oguata ohóvo pe y rováre, ha oma’ẽ ykéramo katu pe yvytu ratã ombokacha ichupe. Pe y pochy ohypýi hova, ipy’amirĩ ha oñepyrũ oñapymi. Upépe ñande ra’y osapukái: Socórro Ñandejára.

Pe jerovia pu’aka rupive ñande jahasa heta rraudal ñarõ ha yvytu ratã. Pe kyhyje ha py’a mokõi katu ñanemokangy ha ñanemboguevi. Hesu ou ñane rendápe opáichavo, ombohasa ñandéve ipo ha ndohejái ñañapymi.

Pa’i Alberto Luna.