Ñahendu Hesu. Martes Semana 13a TO

Escucha el evangelio y la reflexión en: https://youtu.be/mjXVw85P3sE

Martes Semana 13^a TO                                                       

           Mateo 8, 23 – 27.

UpérõJesús ojupi peteĩ kanóape, ha idisípulokuéra oho hendive. Peichaháguinte, ho’a sapy’a peteĩ yvytu neratãva ha pe y pochy oñepyrũ oike pe kanóape. Jesús katu oke ohóvo hína.

Umi idisípulokuéra omombáy Jesúspe ha he’i chupe:

— Maéstro, epáy. Cháke jajahogapáta niko.

Jesús katu he’i chupekuéra:

— Mba’éreiko pekyhyjepa. Pejerovia’i ete piko péicharõ Ñandejárare.

Upévo, Jesús opu’ã oñembo’y. Hatã oñe’ẽ pe yvytu ha upe ýpe. Opi pe yvytu ha oguapy pe y. Idisípulokuéra katu opondera joa, ha he’i:

— Mávatepa kóva, yvytu ha y pochy jepe iñe’ẽ rendúva chupe.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

            Péicha háguinte… yvytu ne ratãva, y pochy oike ñande kanóa’ípe… Péicha háguinte, ñaime porãite hágui, ñaimo’ã’ỹete hágui, ñaha’arõ’ỹete hágui osẽ ñande raperãme apañuãi ikáchova ñanembokuchu paitéva. Oinupã ñande pyti’a ha ñanembovava nañande reityetéi ramo… Péicha háguinte japyta ñande py’a tarova, jaryrýi jakyhyje, opa jasapukái, socorro jajerure. Upéicha oñeñandu umi Hesu apóstol pe kanóa’ípe, ojagarráramo guare ichupe kuéra pe tormenta vai. Oiméma ramo hína oho haguãicha amo huguápe opavave. Ha Hesu katu oke hína, mba’evérõ guaícha. 

Ivai vove la pórte ha jajejopy vai vove ha’ete ku ñaneñóva ha okañy ramo guáicha ñande hegui Ñandejára, hesarái ramoguáicha ñande hegui. Pévare ningo umi apóstol kuéra tesaparápe ojecháva hína oho hikuái osapukái ha omombáy Ñandejára. Ñande avei jejopy vaípe ha nañandepu’akavéi ete vove jaha háicha ñamyengekói Ñandejára, Tupãsy ha umi santo mimi oĩ háichape ñañembo’e, ñamyataindy, ñamoĩ promesa, ha jajerure asy.

Hesu katu opáy ha opu’ãvo oityvyro’imi ichupe kuéra ipy’amirĩ ha ojerovia’i haguére. Ha’ete voi ku ñandéve mba’e oñe’ẽva hína. Ajépa che irũ ha che reindy. Ha’ete ku Hesu he’íva ñandéve Ñandejára oimeha ñande ykére opa ára, iporã ha ivai jave. Ha’e ndopoíri  ñande hegui araka’eve, ha’e añetehápe oisãmbyhy ñande rekove ha omomýi ko yvy tuicha háicha, ha’e omba’apo ñane ndive ha ñanemoirũ. Ñanderejánte ko ha oipotánte ave ñande jehegui, nañanderekói ñande pógui mitã tavýicha. Ome’ẽ ñandéve upe pu’aka ha katupyry jajapo haguã heta mba’e ñande pórupi. Ojerovia ñande rehe. Peteĩ túva térã peteĩ sy oheja háicha imembýpe oiko ijehegui, oma’ẽ ramo jepe hese mombyrymi guive.

San Ignacio niko he’i, ñande jajapóta ramo hína ñane rembiapo ñañeha’ã mbaite vaerã hese ñande jehegui, oimemba ramo guáicha ñande pópe. Ha upe jave jajerovia vaerã avei Ñandejára rehe, opa mba’e oime ramo guáicha ipópe.

Pa’i Alberto Luna.