Ñahendu Hesu. Martes Semana 14a TO

Escucha el evangelio y la reflexión en: https://youtu.be/MfBiHMJT_cU

Martes Semana 14^a TO                                 

                      Mateo 9, 32 – 38.

Upérõojereru
Jesús rendápe peteĩ karai iñe’ẽngúva, demóño oguerekógui chupe ipoguýpe. Ha
Jesús omosẽvo pe demóño, pe iñe’ẽngúva oñepyrũ oñe’ẽ. Opavave oñemondyipa ha
he’i: — Araka’e piko jahecháva ko’ã mba’e ko ñane retãme.

Umi fariséo katu
he’i:

— Pe demóño
ruvicha voi niko pe ohejáva chupe omosẽ umi demóño.

Jesús opa puebloha rupi oiko. Tupao oĩháme, upépe oikémiva ombo’e. Omoherakuã ave pe marandu porã Ñandejára Rréino rehegua, ha omonguera opaichagua hasývape. Ha ohechávo mba’éichapa heta umi ijerére ijatýva, oiporiahuvereko chupe kuéra. Ha’etévaicha chupe ikane’õ ha okañymbávaicha hikuái, ku ovecha herekua’ỹvaicha. He’i idisípulo kuérape: — Ajépakotuicha pe kokue ha heta iñemitỹngue, omono’õva’erãnte mbovy.Pejerure aipórõ pe kokue járape tombouve omono’õ va’erã.

Ñandejára
Jesucristo ñe’ẽ

ÑAMBOGUEJY ÑANDE REKOVÉPE

Ndajahasaséi ningo tenonde ñañe’ẽ haguã,
jalee haguã Ñandejára ñe’ẽ tupaópe. Hasy jajuhu haguã ombo’éva mitã, ombyatýva
mitãkuimba’e ha mitãkuña grupo juvenil-pe, omotenondéva tembiapo comunidápe,
omyakãva organización. Ha oiméramo jaheka umíva umi tembiaporã, tove tove mante
ñahendu, tohóna huláno, Ña hulána, che ningo nañe’ẽkuaái…

Heta mba’e porã tekotevẽva ñamombe’u opyta
oñeñapytĩ ñande jurúpe, ñatĩgui, terã jakyhyjegui japyta ñakirirĩ. Ñahendu Hesu
rendápe ojegueru peteĩ iñe’ẽngúva. Ha Hesu ojora upe omokũsãva ichupe ikatu
haguãicha oñe’ẽ opavave ndive.

Jahecha mba’éichapa Hesu ohenói,
ombokatupyry ha omokyre’ỹ umi okirirĩva, otĩva ha ndojeroviáiva ijehe. Umívape
Hesu ojora ikũ, ha ojevale hese kuéra, oĩve haguã omombe’úva ñe’ẽ porã,
omoherakuãva Ñandejára ñe’ẽ.

Ñambyasy ningo jahecháramo heta ñande
rapicha oĩmba reíva upérupi, ha’ete voi ku oñemombóva tape ykére, ndoikuáaiva
mba’épa ojapo hekovégui, oñedesatina, oime reimínteva, ohundi reíva
hekove.  Hesu py’áre opoko avei ohechávo
hetaite péicha oiméva, ndaipóriva oma’ẽva hese kuéra, ha ombyasy,
oiporiahuvereko ichupe kuéra.

Hetaite oime oha’arõva upe marandu porã
Ñandejáragui oúva, ha sa’i umi ojeitýva upe tembiapópe. Hesu he’i jajerure
haguã upe kokue járape tombouve ñandéve mba’apohára katupyry ñane pytyvõ, toĩve
omboguatáva hapicha Ñandejára rapére. 
Mba’épa oñanduka ndéve che reindy ha ndéve che irũ, hetaite ñande
rapicha ohundíva hekove ndorekóigui omoirũva ha onohẽva ichupe kuéra tapépe.

Pa’i
Alberto Luna.