Ñahendu Hesu. Mièrcoles Semana 19a TO

Escucha el evangelio y la reflexión en: https://youtu.be/omaqkp3Q6aU

Miércoles 19a TO            

                                                     Mateo 18, 15 – 20

    Upérõ Jesús he’i idisípulokuérape: Nde rapicha ojapo ramo nde rehe ivaíva, eñe’ẽ chupe ha’eñoháme. Ehechauka chupe moõpa ojavy. Ne rendu ramo, pepyta porã jeýne.  Na ne renduséi ramo katu, ehenói peteĩ térã mokõime, tohendu opa pejéva. Ñandejára Ñe’ẽme niko he’i opa mba’e oje’éva, oje’e vaerã mokõi térã mbohapy rovake.  Ha chupekuéra nohenduséi ramo katu, eikuaauka opavave rovake tupaópe. Ha upépe nohenduséi ramo katu, pereko chupe pende rehegua’ỹva ramo térã impuésto okovráva Rómape guarãicha ramo.

    Añete ha’e peẽme, opa mba’e peẽ pemosãva ko yvy ári oñemosãta avei yvágape. Ha opa mba’e peẽ peheja reíva ko yvy ári, yvágape avei ojeheja reíta.

    Ha’e porãta peẽme, mokõi peñemoĩ ramo peteĩ ñe’ẽme pejerurévo oimeraẽ mba’e che ru yvágape oĩvape, ha’e ome’ẽ vaerã peẽme.  Ha mokõi térã mbohapy oñembyaty ramo che rérape, upépe aiméta che, hendive kuéra.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Ñande niko ja’e upe ofalláva ñanendive ou vaerãha oñe’ẽ ñanendive, ohechakuaa ha ombyasy hembiapo vaikue, upépe ikatu haguãicha jaheja rei ichupe, ñaperdona ha jaiko porã jey. Pe jeiko vai ha pochy ndojerái aja niko ñane apytĩ su’u hina ha ñanemosã, nañanderejái py’a porã ha py’a guapýpe oñondive. Upévare Hesu he’i jajora vaerãha umíva ñande jehegui ko yvy árima voi, ojejora haguã avei ñandéve yvágape. Upéva jajoráramo, he’i Hesu, túicha ñande vevúi ha ñane sãso jaguata jey haguã py’a porã ha vy’ápe oñondive.

Hesu he’i ñande rapicha ojavýramo ñanendive nañaha’arõi vaerãha ha’e ou. Ñande voi jaheka vaerã ha ñañeha’a hese ñemongeta porãme. Ñaipytyvõ ichupe ohechakuaa haguã hembiapo vaikue, anive haguã ojavy ha osẽ haguã karuguágui. Ñane irũ ojavýva nañanerenduséi ha iraríramo ñande hegui katu, jaheka umi ohendu vaerãme toñemoñe’ẽ ichupe, jahechápa péicha nosẽi tape vaígui. Ojetyvyróramo upévagui, ja’e upe ñande komunidápe, toñeha’ã avei hese ñemongeta ha ñembo’épe. Ha upévape nohendúi ramo katu, upépe raẽ ikatu ja’e jajapopáma hague oĩva ñande pópe.

Hesu he’i avei ñandéve ñañomoirũramo ñañembo’e haguã oñondive ha jajerure haguã umi ijetu’uvéva rehe, umi oñeñapytĩ su’úva rehe, Ñandejára ñanerendúne haguã. Ha mokõi térã mbohapy ñañembyatýramo hérape, ha’e oimetaha ñande apytépe.

Ko’ápe che reindy ha nde che irũ, jaiporúta mante upe ñe’ẽ he’íva: “Eñeha’ã toroipytyvõ, he’i Kirito”. Ha ñañeha’ãvo jagueru jey upe ñande rapicha okañývape ñemongeta porã rupive, jahupi avei ñande po jovái yvága gotyo jajerure asývo hese.

Pa’i Jasy.