Ñahendu Hesu. Miércoles Semana 24° TO

Escucha el evangelio y la reflexión en: https://youtu.be/RT-vB6NyVrs

Miércoles 24 a TO

Lucas 7, 31 – 35.

Upérõ Jesús he’i: Peikuaápa mávapepa pejogua peẽ ko’agãgua. Pejogua umi mitãme oguapýva plásape ha osapukáiva hapicha kuérape: ‘Rombopu peẽme mbaraka ha ndapejerokýi. Ropurahéi ñembyasy peẽme ha napenerasẽi.’

Ou niko Juan Bautista, o’ajunáva ha ndo’úiva víno, ha pesẽ peje hese demóño oguerekoha. Upéi katu aju che, akaru ha amboy’úva, ha peje che rehe che karu ha che ka’uha, aikógui heko añáva ha umi impuésto cobraha ndive.

Umi Ñandejára arandu oikuaáva katu ohechakuaa upe añeteguáva.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Upe ndojeroviáiva ha ndogustáiva ichupe Ñandejára rehegua, ñembo’e, tupao umíva, niko ombovaíta katuete ndéve yvága jepe emboguejýramo henondépe. Ijetu’u epilla haguã iládo la irarívagui ha ndoikuaaséiva voi mba’eve Ñandejáragui.

Ha’ete voi ku remokyrỹi ha ndopukáiva, nerasẽ ha noñembyasýiva. Rejapóramo peteĩ vy’arã he’íne umíva ndojejapói vaerahã tupaópe, ha nde karai guasu etereíramo katu he’íne nde arhélha. Mba’eve jajapóvante naiporãi. Ñanemboka’apa sapy’ánte ha ndajaikuaavéima mba’épa jajapóta jaheka haguã iládo. Ñande picha ha jakapuse.

“Mba’e piko la ho’uséva ko’ãva”, ja’e.

Ha péicha nunga niko oiméne pe Hesu oñandu va’ekue umi fariseo ha Moise léi ombo’évare. Hesu opáicha oñeha’ã oñemoñe’ẽ ha ohesa’ỹijo ichupekuéra Ñandejára rembipota, ha ha’e kuéra katu irari ichugui. Hesu mboyve ou kuri Juan Bautísta oikóva desiértope, ojapóva ajúno ha ndo’úiva víno. Ha ndogustáinte avei ichupe kuéra.

He’i hese ojopy etereimaha, oñempajenaha hamba’e. Ha upéi katu ou Hesu, ojehe’áva opavave ndive, okarúva ha ho’úva víno, ha he’íma katu hese ikaru ha ika’uha, ojehe’aha
hekovaíva rehe hamba’e.

Ko’ãva omboka’apa avei Hesúpe amo ipahápe, ha ombojoja chupekuéra umi mitã lája vaíre, ndereikuaáiva sapy’ánte mba’e añápa la ho’uséva, ha mba’éichapa eme’ẽta ichupekuéra gústo.

Ha upéicha oikóramo raka’e Hesúre, piko mba’e la ñande. Upéicha jeýta mante niko, aje. Rei ñame’ẽséta gústo opavavépe, reiete ñaha’arõta opavave ojepopete ha omomorã ñandéve ñande jerovia, ñane ñembo’e ha ñane compromiso.

Jaha hese ñande rape rupi. Upe Ñandejára ñanerenói hárupi ñapena’ỹre ñe’ẽre.
Ñandejára ome’ẽ vove ñandéve bonánsa, japurahéi, javy’a ha jajeroky, ha ou vove ñembyasy ára katu ñanerasẽne hendive. He’i háicha Santa Teresa: Otokáramo ñandéve ynambu, ja’u ha ñaneryguatã, ha otoka vove peniténsia katu, jajapo la peniténsia.

Pa’i Jasy.