Ñahendu Hesu Ñe’ê. Domingo 02 de febrero

Escucha el evangelio y la reflexión en:  https://youtu.be/hneFGqfaXnY

2 febrero: Hesu oñemoĩ Ñandejára renondépe. Lucas 2, 22 – 40.

Ha ohasávo 40 ára Jesús onase hague, ogueraha hikuái pe mitã Jerusalénpe, ha omoĩ
Ñandejára renondépe. Péicha ojapo hikuái Ñandejára mandamiénto he’ígui: “Opa mitã
kuimba’e ypykue oñemboyke vaerã Ñandejárape guarã”. Ñandejára mandamiénto he’i
ave, ogueraha vaerãha hikuái, ofrendarã, mokõi pykasu ỹrõ katu mokõi jeruti ra’y.

Umiha árape niko oiko vaekue Jerusalénpe Simeón, karai marangatu. Oha’arõva oikóvo
Ñandejára osalva haguã Israélpe. Ha Espíritu Santo oĩ hendive, ha oikuaauka ra’e chupe
nomano mo’ãiha ohecha mboyve pe Mesías, Ñandejára he’i vaekue omboutaha.

Ha Espíritu Santo ogueraha Simeónpe tupaópe. Ha María ha José oikévo tupaópe pe mitã
reheve, okumpli haguã Ñandejára mandamiénto, Simeón ohupi pe mitã ijyva ári ha
omomba’e guasu Ñandejárape kóicha:

Ko’ágã, Ñandejára, rejapóma ne ñe’ẽ. Ikatúma che reja amano py’a guapýpe.
Che resa teépe niko ahecha ko rejapóva ne retã resalva haguã.

Ha opa tetã ohecháne avei. Ko mba’e rendy ohesapétava niko opa tetãme guarã,
ha ombotuicháta ne retã Israel.

José ha María opyta ijurujái ohendúvo umi mba’e Simeón he’íva pe mitãre. Upéi
Simeón ohovasa chupekuéra, ha he’i Maríape: — Peikuaáke kóva ko mitã ouha oity
haguã heta Israelguápe. Péicha ave, hetápe omopu’ã vaerã ágã. Ha’e niko peteĩ mba’e
rechaukaháta hína, ha heta oĩta ojahéiva hese. Ha ndéve María, hasýta ku kysépe
rejekutúrõ guáicha ne korasõme. Ko’ã mba’e ohechaukáta mba’e-mba’épa oĩ hína umi
géntekuéra akãme.

Upe jave oĩ hína avei tupaópe peteĩ kuñakarai iguãiguĩmava, proféta ha’e. Héra niko
Ana, Penuel rajy, Aser ñemoñare. Omenda vaekue imitãme ha oiko jepe iména ndive 7
áño. Upéi katu iména omano. Ana ombotýma 84 áño, ha oiko ha’eño. Araka’eve nosẽiva
Tupaógui, ha omomba’e guasúva Ñandejárape ára ha pyhare. O’ajuna ha oñembo’e.

Simeón oñe’ẽmba riremi, oguãhẽ sapy’a Ana. Ha oñepyrũ omomba’e guasu Ñandejárape. Oñe’ẽ pe mitã Jesús rehe opa umi oha’arõvape Jerusalén osẽ jejopy vaígui.

José ha María okumplipa rire Ñandejára mandamiénto, ojevy hikuái Nazarétpe,
opytáva Galiléape. Pe mitã katu okakuaa ohóvo, henyhẽ arandúgui ha Tupã ohovasa
chupe.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ohóvo ñande hegui pe lu niko japyta pytũmbýpe, upéicha jave ñamyendy jepi
tataindy, jahupi yvate ikatu haguã jahecha ñande rape. Ñama’ẽ ha jajesareko Hesúre isy
jyva ári, ha ijykére San José. Karai Simeón ohuguaitĩ haguéicha chupe, ohupi pe mitã,
omoñe’ẽmba ipy’arenyhẽgui ha Ána avei omoherakuã haguéicha pe mitãmíme. Ñande
avei, che irü ha che reindy, jahupívo ñane rataindy Tupasỹ Candelaria ndive jadesea
ñande py’aite guive pe Hesu rekove, iñe’ẽ ha igrásia marangatu ohesape ñande rekove.

Pa’i Alberto Luna.