Ñahendu Jesús Ñe’ẽ. Domingo 22º Durante el Año

Escucha el evangelio y la reflexión en: https://youtu.be/V-SalBheWNI

Domingo 22º Durante el Año Ciclo C. Lucas 14, 1. 7 – 14

Peteĩ pytu’uha árape, peteĩ fariséo okonvida Jesúspe oho haguã okaru hendive hógape. Ha opa umi oĩva upépe omaña joa hína Jesús rehe.

Jesús ohecha mba’éichapa umi oñekonvida va’ekue, tenondete voi oho oguapy. Osẽ he’i chupekuéra: Reñekonvidárõ menda hápe, anítei reho reguapy pe mesa akãme voi. Cháke ikatúne oguãhẽ peteĩ tuichavéva ndehegui. Ha upe ne konvida va’ekue oúne he’i ndéve, “Epu’ãta mante oguapy haguã kóva”. Tuicha ñemotĩ rehasáne.

Upéi ave, rehóne eguapy amo huguaitépe. Reñekonvidárõ katu, tereho eguapy amoite huguápe. Ágã nde rechávo pe ne konvida vaekue, oúne he’i ndéve, “Che irũ, ehasána eguapy amo iñakãme”.

Upéicharõ, umi oguapýva nde yke rupi, tuicha nembojerovia va’erã. Umi ojejapo ha oñembotuicháva niko oñemomichĩ vaerã ágã, ha umi heko mirĩva katu oñembotuicháne.

Upéi Jesús he’i pe chupe okonvida va’ekuépe: Rejapórõ karu guasu, árape térã pyhare, ani ekonvida ne irũ nguérape, térã nde ryvy ha nde ryke’ykuérape, térã nde rogaguápe ha umi rríkokuéra nde róga jere rupi oikóvape. Ágã upéi, ha’ekuéra ave ne konvidáne, ha péicha repyta porãne hendivekuéra.

Nde katu ágã rejapo jeývo, ekonvida umi imboriahúvape, umi ipy chékeva, iñepãva ha umi hesatũvape. Ha’e kuéra niko ndaikatu mo’ãi ne konvida mba’evépe ha ndaikatu mo’ãi omyengovia ndéve. Ñandejára katu tuicha nde rovasa vaerã ágã opa hekojojáva oikove jeyha árape.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Lo mitã okaseáramo hína peskáda rehegua, pe oñepyrũva oikutúramo peteĩ, uperiregua oikutúma mokõi, ha pe ambueve katu oikutúma mbohapy. Oñoganamba. Ha nañandetapykueséi niko avavégui.

Jaipota oñeme’ẽ ñandéve upe ñane mba’éva ha ani ou avave ñande pe’a ñane rendágui. Sapy’ánteko ñañemoĩ rangue pe ñane rendápe porã, ñañembo tuichaseve ñande rapicha renondépe.

Jesús ñanembo’e iporãve ñambojerovia ñande rapicha. Ani ñande taryrýieterei punta itépe voi ñañemoĩ haguã. Ani ñandénte la pelóta jára, ñandénte gua’u la jaikuaapáva, ñande rógape, ñane comunidad ha jaiko hárupi. Jaheja káncha ñande rapichápe. Toñe’ẽ, noñe’ẽ porãiramo jepe, tojapo, ndojapo porãmbáiramo jepe. Tapére oiko la guéi hína.

Iporãve, he’i Jesús, ñande voi ñañembotapykue imi. Amo ipahápe niko Ñandejára hína pe ñanemohendátava ñanerendaguã teepe, ndaha’éi ñande.

ÑAÑEMBO’E OÑONDIVE

Ñandejára Ore Ru, ndereipotáiva avave itapykue. Eme’ẽ oréve py’aporã ani haguã roheja avave oñemboyke ha oñemohemby. Ha rombojerovia haguã umi tesaráipe oikóva. Amén.

Pa’i Jasy.