Ñahendu Hesu Ñe’ê. Domingo 24 de Noviembre

Escucha la reflexión en:    https://youtu.be/jWQnbrxfzeg

Lucas 23, 35-43

Upérõ Jesús oñemosaingo rire kurusúre, opa umi oĩva upépe oma’ẽ joa hikuái hese.
Mburuvichakuéra jepe oñembohory hese, ha he’i: — Hetápeko osalva va’ekue. Ha’ete
voína tojesalva ha’e ramo añete pe Mesías, Ñandejára oiporavo va’ekue.

Umi soldádo avei oñembohory Jesús rehe. Oñemboja ijykére ha ho’uka chupe víno
hái. Upéi he’i: — Nde ramo añete hudío kuéra rréi, ejesalva ndete.
Omoĩ hikuái peteĩ kuatia iñakã ári, he’íva, “Kóva niko hudío kuéra rréi.”

Peteĩ umi mba’e vai apoha oñemosaingóva avei hína kurusúre ijykére, oñembohory
hese he’ívo: — Nde ramo upe Mesías na, ejesalva nde. Ha ore salva oréve ave.
Pe ambue katu oja’o upe hapichápe, ha he’i chupe: — Nderekyhyjéi piko Tupãgui.

Peteĩcha niko ñamanóta. Ñande niko hekópe jahasa asy hína. Oñemyengovia ñandéve
ñane rembiapo vaikue. Kóva katu niko ndojapói mba’eve ivaíva.

Upéi osẽ he’i Jesúspe: — Jesús, ne mandu’amíkena che rehe ág̃a rejúvo ne rréino
reheve.
Jesús he’i chupe: — Añete ha’e ndéve, ko árape reimetaha yvágape che ndive.
Ñandejára Jesucristo ñe’ẽ

ÑAMBOGUEJY ÑANDE REKOVÉPE

La karai rréi ningo mburuvicha guasu hína, omanda guasu. Heta tetã ningo ko’ágã peve oreko gueteri la irréi. Ñande niko ndajarekói upéva. Ymave la jareko va’ekue ha’e umi kasíke omyakãva itáva kuéra. Ha upéi ningo ou vaekue España ñande reko ipoguýpe, ha upépe la rréi omanda vaekue ko’ápe. Upéinteko jajetyvyro va’ekue ichuguikuéra ave. Ha japytáma ñande ñamoĩ ha jaiporavo ñande ruvicharã.

Ko árape ningo jaguerohory Cristo Rey ára. Ñandejára Hesu ñande ruvicha guasu, omandáva ñande rehe ha omyakãva ñande iglésia. Upéva ikatu che irũ ñama’ẽmi tenonderã, oimépa Ñandejára la orreináva ñande rekovépe, térãpa mba’e la omandáva ñande rehe ha la ñanegovernáva. Mávapepa ñañakãity ha mba’e rapykueri jaiko.

Ha upéi katu ñama’ẽmi. La ñande rréi ningo la ikoróna ndaha’éi óro, ha la iguapyha katu ndorekói, oñemosaingo katu ningo kurusúre. Ha umi henondépe oĩva katu oñakãity rangue henondépe oñembohory joa hese. Mba’eichagua rréi piko nde.

He’i ningo chupe umi soldado, umi mburuvicha ha pe ijykére oñemosaingóva jepe.
Ndaikatúi niko rejesalva nde voi. Mba’éicha piko péicharamo resalváta avavépe.

Ha mba’épa he’iséne hína ñandéve che reindy ha nde che irũ la ñande rréi, la
omandáva ñande rehe, péicha ou oñemoĩ ñanerenondépe. Mba’épa oiméne ñanembo’ese
ha mamórupi oime ñanesambyhy ha ñanemboguatase hendive. Mba’épa reñandu.

Pa’i Alberto Luna.