Ñahendu Hesu Ñe’ẽ. Sábado VI de Pascua
19 mayo, 2023Ñahendu Hesu Ñe’ẽ. Lunes VII de Pascua
22 mayo, 2023
Escucha el evangelio y la reflexión en: https://youtu.be/7iDsH0GFv0Q
Domingo VII Pascua. Ascensión Ciclo A.Mateo 28, 16 – 20
Upérõ umi 11 Jesús disípulo oho Galiléape, pe sérro Jesús he’i haguépe chupekuéra oho hag̃uáme. Ha ohechávo chupe, oñesũmba hikuái henondépe. Oĩ jepe ijapytépekuéra ndogueroviapáiva ha’eha Jesús pe ohecháva.
Jesús katu oñemboja hendápe kuéra ha he’i: — Opa mba’e yvága ha yvýpe oĩva niko Ñandejára omoĩmba che pópe. Tapeho aipo ramo opa tetã rupi, pembo’e opavavépe ha pejapo chuguikuéra che disípulo. Pemongarai umíva Túva, Ta’ýra ha Espíritu Santo rérape, ha pembo’e chupe kuéra opa umi mba’e che pombo’e va’ekue peẽme. Peikuaáke aimetaha pene ndive ára paha peve.
Ñandejára Jesucristo ñe’ẽ
ÑAMBOGUEJY ÑANDE REKOVÉPE
“Ñandereja fuláno”. He’i ningo lo mitã, oiméramo jaikuaáva omano ha ojehekýi ñande apytégui. Ha upéicha ningo añete oiko ñande rapicha omohu’ãvo iguata ko yvy apére. Ñande reja. Ha opytáramo jepe ipore’ỹme mandu’a umi iñe’ẽngue, hembiapokue ha umi oñondive jahasa vaekue rehe, ndajajupytyvéima hendive ymave guaréicha.
Ko’ãga iñambuéma ñande rekove hese’ỹ.Hesu avei omohu’ãvo iguata ko yvy apére ojehekýi umi iñirũnguéra gui. Apostol, disípulo ha disípulakuéra ityre’ỹ ichugui. Ndaha’evéima ymave guaréicha ha’e oiméramo guare ijapytépekuéra. Ha’eño hikuái ojehekýivo imbo’ehára ha ndoikuaa porãi moõ gotyopa ojapíta.
Ndaipóri vaicha ijapytépekuéra mávapa omboguatáta ichupekuéra, mávapa ombo’éta Ñandejára rape hamba’e.Ha upéicha ningo oñepyrũ oguata pe ñande Iglesia Hesu omohu’ãramo guare hekove, hemimbo’e ha hembiapo.
Apóstol, disípulo ha disípulakuéra ojejuhu ha’eño oñondive. Ha upépe tekotevẽ ijehegui hikuái, tekotevẽ oñemongeta oñondive, ohecha mba’éichapa omboguatáta upe Hesu ombo’e va’ekue ichupekuéra, mávapa omyakãta ñembo’e, mávapa oporombo’éta, mávapa ohecháta tembi’u ha oñeikotevẽva, mávapa osẽta opredika ha mávapa opytáta. Ojerovia haguéicha Hesúre, tekotevẽ ko’a guive ojerovia ojuehe, oñopytyvõ ha oñomoirũ.
Ko’ã tiémpo ñaimévape ningo ñande avei tekotevẽ ñamyive ñande jehegui, ñaha’arõ’ỹre yvágagui oguejy jey Hesu ha he’i ñandéve mba’épa jajapo vaerã ha ome’ẽ ñandéve ñaikotevẽva.
Aníkena upéicha avei che irũ ha nde che reindy oiko ñande rehe, ha japyta ñama’ẽ tupaóre ha ñaha’arõ ou pa’i, obispo, térã hermana he’i ñandéve mba’épa jajapo va’erã ha omyakã tembiapo. Hi’ãitéma cristianokuéra opaichagua jajetyvyro ha ñamýi ñande jehegui jajapóvo upe Hesu ojapo haguéicha ha ohejáva ñandéve ñanerembiaporã.
ÑAÑEMBO’E OÑONDIVE
Ñandejára Hesukrísto, remohu’ãvo nde rekove rejupi va’ekue nde Ru ykére yvágape, upégui ore moirũ haguã opa ára. Emyendy kena orepype py’aguasu ha kyre’ỹ, nde rérape rojapo haguã ore avei nde rejapo haguéicha. Romombe’u haguã kyhyje’ỹre opárupiete ne ñe’ẽ, ha romoguahẽ haguã ore rapichápe ne mborayhu ha jehovasa. Amén.
Pa’i Alberto Luna.