Ñahendu Hesu Ñe’ê. Lunes 09 de Diciembre

Escucha la reflexión en: https://youtu.be/rO7m2CCtLag

  Lucas 5, 17 – 26.

Peteĩ árape ou Jesús rendápe heta Fariséo ha umi Moisés léy ombo’éva. Opáguio ou hikuái: Galiléagui, Judágui ha Jerusaléngui ave. Ou hikuái ojapysaka haguã Jesús rehe. Ha ojekuaágui Jesús ikatupyryha omonguera haguã hasývape,  oĩ oguãhẽva ha oguerúva peteĩ paralítikope hupápe. Omoingese mo’ã chupe hikuái pe kotýpe, ha omoĩ Jesús renondépe.   Ndojuhúi hikuái moõ rupípa oikéta. Umi hénte kuéra niko ojo’apa pe okẽme. Upémarõ, ojupi hikuái pe óga ári, ombokua pe óga técho ha omboguejy hikuái pe hasývape, hupápe, Jesús renondépe.   Jesús ohechávo mba’eichaitépa ha’e kuéra ojerovia hese, he’i pe hasývape: Che irũ, aheja rei ndéve nde pekádo.

   Upévo, umi Moisés léy ombo’éva ha umi fariséo he’i joa: “Kóva piko oimo’ã ha’e Ñandejára mba’e. Mba’éicha piko aipo he’íta “aheja rei ndéve nde pekádo”. Ñandejára añónte niko pe ikatúva oheja rei ñandéve ñane angaipa.”

    Jesús katu oikuaa mba’épa he’i hína hikuái ipy’apýpe. Ojere oporandu chupe kuéra: – Mba’éiko upe pende py’apýpe pejéva hína.   Peje chéve mba’épa ndahasyive ajapo: aheja rei ko ñande rapichápe iñangaipa, térãpa amonguera.  Néi, ahechaukáta peẽme che ikatuha aheja reívo oime raẽvape hembiapo vaikue.

Ha upévo he’i pe hasývape: – Epu’ã, ehupi nde rupa ha tereho nde rógape.

   Upepete pe hasýva opu’ã opavave rovake, ohupi hupa ha oguerohory Ñandejárape ohóvo hógape.  Maymáva opyta ijurujái ha opondera joaite. Oguerohory hikuái Ñandejárape he’ívo: – Tuicha milágro niko jahecha ko árape.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Jajepy’apy niko ára ko’ẽre ja’u vaerãre, ñañemonde ha ñañepohano haguã. Upe ndorekóiva oipota imotorã ha upe imótova katu oipotáma hi’autorã. Hoga’íva ombotuichase ha upéicha heta mba’ére jajypy’apy, jaiko hapykuéri ha ñande ry’ái jahupyty haguã.

Jahecha oime oguerúva peteĩ hasývape Hesu renondépe. Ndaikatúiramo oike okẽ rupi oike técho rupi, upéicha oiko jepi heta hasývare oikova hospital rupi, ndaijái kotýpe ha oike opyta upe korredor pe oha’arõ.

Hesu katu ohechávo ijerovia omonguera rangue hete, tenonderã omonguera ipy’a, ombovevúi ipekádo, ome’ẽ raẽ chupe py’aguapy. Tuicha mba’e niko pe tesãi, opaichavo upe py’a porã ha py’a guapy tuichave mba’e hína. Upéicha Hesu ñanembo’e ñamotenonde haguã ñande espíritu, ñañepohanouka raẽ ñande py’ápe, jaheja Ñandejára toike ñande pype, jaipe’a chupe ñane korasõ jerovia rupive.

Mba’épa eremi che irũ ha nde che reindy ko Navidarã ejapo vove nde pesebre ema’ẽmi mba’eichaitépa ikatu emohenda porã upe pesebre nde py’apegua, ou hagua onase ipype Ñandejára, upéi ágã ejepy’apy haguã mba’épa ja’úta ha ñamboy’úta, ha mba’éichapa ñañemondéta.

Pa’i Jasy.