Ñahendu Hesu Ñe’ê. Martes 10 de septiembre

Ñahendu Hesu Ñe’ê. Martes 10 de septiembre

                                                           Lucas 6, 12 – 19

 Umíva umi árape, Jesús ojupi peteĩ sérro ru’ãme oñembo’e haguã. Ha pyhare pukukue opyta upépe.  Ko’ẽ rire ohenói umi idisípulope hendápe, ha oiporavo 12. Umívape ohenói apóstol.  Umíva hína: Simón, Jesús ombohéra vaekue avei Pedro, ha tyvýra Andrés. Upéi oĩ Santiágo, Juan, Felipe, Bartolomé,  Mateo, Tomás, ha Santiágo, Alféo ra’y. Avei Simón, Selóte oje’eha,  Judas, Santiágo ra’y; ha ipahápe Judas Iscariote, ku upéi otraisiona vaekue Jesúspe. Jesús oguejy idisípulo kuéra ndive pe sérrogui, ha opyta hikuái ñúme. Oñembyatypa ra’e upépe umi hapykuéri oikóva. Heta avei oĩ oúva Judéagui, Jerusalén, Tíro ha Sidóngui.  Ou ra’e hikuái ohendúvo Jesúspe, omonguera haguã chupe kuéra imba’asýgui. Umi demóño po guýpe oikóva okuerapánte avei.  Maymávante opokose Jesús rehe, oikuaágui pe pu’aka osẽva chugui omonguerataha chupe kuéra. 

Ñandejára Hesukrísto ñe’ẽ. 

ÑAMBOGUEJY ÑANDE REKOVÉPE            

     Heta niko oime ijatýva Hesu jerere. Opaichagua oĩ. Oime oúva sapy’ánte ohendu chupe ha upéi oho jey hógape. Oĩ opyta miéva hendive, oguata ha omoirũva chupe hetave ára pukukue, oĩ katu ojejokuáiukáva voi chupe, umíva ha’éta hína umi oñehenóiva “disípulo”, temimbo’e, kuimba’e ha kuña omoirũva Hesúpe. Ha upéi katu oĩ umi oikóva voi hendive oparupiete, ára ha pyhare omoirũva chupe ohohápe, ha oñemosãitéva voi hese, umíva ha’e hína apóstol kuéra, Hesu voi oiporavo vaekue oiko haguã hendive. 

     Ha mba’éicha rupípa Hesu ohenói chupe kuéra? Marãpa ohenói? Omombe’u niko ñandéve San Lúka hetaitereimaha umi ijatýva iválle ha oparupigua oúva Hesu rekávo, ohenduséva iñe’ẽ ha okueraséva imba’asýgui. Ha Hesu oñandu ha’eño ndaipu’akái ha ndakatuveimaha oñatende porã opavave rehe, oikotevẽ iñirũra omoguahẽ haguã pe Ñandejára grásia heta hetavépe ou meméva oheka ichupe. Ha umi oúva opokosénte jepe Hesúre, oikuaágui osẽha ichugui peteĩ pu’aka marangatu omongueráva opavavépe. Ha péva pe pu’aka marangatu Hesu orekóva niko ha’e omboja’o ha ombohasa kuri ijapóstol kuérape, oipytyvõ haguã ichupe, ohupytyka haguã hetavépe, ha upéi opyta haguã ñandéve guarã avei Hesu rekovia. 

     Ñande voi avei, che reindy ha nde che irũ, ñaikotevẽva Hesu ñanepohãno, ha jaipotáva ha’e opokomínte jepe ñande rehe jakuera ha ñande py’aguapy haguã, ikatu ñañemboja umi Hesu oheja vaekue rehe ñandéve hekoviáramo ñande Iglesia pe.  Ñandejára rembijokuái ñaneperdona, ñanemongarúva Hesu retépe, oñembo’éva ñande rehe, ñanderovasa, ñanembo’éva Ñandejára rape, Hesu ete voi ojapóramo guáicha ñande rehe. 

Pa’i Jasy.