Ñahendu Hesu Ñe’ê. Martes I de Cuaresma

Escucha el evangelio y la reflexión en: https://youtu.be/DGm8MAXi_KQ

Martes I Cuaresma Mateo 6, 7 – 15.

Upérõ Jesús he’i: Peñembo’e jave ani peñe’ẽ heta rei, ojapoháicha umi Ñandejárare
ojerovia’ỹva. Ha’e kuéra niko oimo’ã oñe’ẽ heta haguére Ñandejára ohendutaha chupe
kuéra. Ani péicha pejapo.

Pende Ru niko oikuaapáma voi pene remikotevẽ, peẽ pejerure mboyve chupe. Peñembo’e jave, kóicha peñembo’e:
Ore Ru yvágape reiméva, toñemomba’e nde réra. Ne mborayhu ta ore añuãmba.

Ne rembipota tojejapo yvy ári yvágape guáicha. Eme’ẽ oréve ore rembi’urã ko árape guarã.

Eheja rei oréve ore pekádo, ore roheja reiháicha umi ore ndive iñañávape. Aníkena ore rehejátei rojepy’a ra’ã. Ore pe’a uvei ivaívagui.

Peẽ peheja rei ramo umi pende rehe ojapo vaívape, pende Ru yvágape oĩva oheja reíta avei peẽme ivaíva pejapóva. Ndapehejaireíri ramo katu umi pende rehe ojapo vaívape, pende Ru oĩva yvágape ndoheja rei mo’ãi avei peẽme pende pekádo.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ñande sy niko pe ógape oñe’ẽvéva jepi ha ñanembojeréva hese ha oikóva ñande reheve ára ko’ẽguive pytũ meve. Opáichavo ñande jaikuaa ñande ru noñeñandu guasúiramo jepe, okirirĩnte ramo jepe oikóvo, ha’e oĩha hina pe óga horkõicha, omboguapýva ijati’y ári ñande róga. Mokõivéva oñondive.

Heta vyrorei jajapóva ñane mitã aja ñande ru ha ñande sy ohecha ha oikuaa porã ha ipy’a renyhẽgui oheja rei ñandéve. Oiméramo japagapáta ñande sy ha ñande rúpe ñande rekove omoheñói hague hetégui, ñanemokunu’ũ ha oñangareko haguére ñande rehe hetaite ro’y pukukue javeve piko, moõgui ñanohẽta ñamyengoviapa haguã?

Ha’ekuéra niko ndojapói jepe voi upéva japaga haguã chupekuéra, ñande rayhúguinte ojapo,
ha mborayhu niko mborayhúpe jeýmante oñemyengovia.

Hesu ñanembo’e Ñandejára ha’eha ñande ru ha ñande sýicha, ndajahecháiramo jepe oĩva ñande ykére, ñande rayhupápe ojapo vaekue ko yvy tuichakue opa mba’e orekóva ipype reheve, ñanembo’éva hembipota iñe’ẽ rupive, ome’ẽva ñandéve ñane rembi’u ha opa ñaikotevẽva, oheja reíva ñane rembiapo vaikueta ha ndohejáiva aña ñane ra’ã ikatu’ỹveha peve jaropu’aka.

Ñande ru ha ñande sy ykére ñaiméramo niko natekotevẽi ñañe’ẽ puku, ñaiménte va’erã hendive, ha’ekuéra ñane andu guive ijykére ha ñande ñañandu chupekuéra, péva iporãma. Reñandúpa nde che irũ ha nde che reindy Ñandejárape nde ru terã nde sy ramo guáicha.

Pa’i Alberto Luna.