Ñahendu Hesu Ñe’ê. Martes IV Cuaresma

Escucha el evangelio y la reflexión en: https://youtu.be/erN33simJJw

Martes IV Cuaresma Juan 5, 1-3ª. 5-18

Jesús oho Jerusalénpe peteĩ arete jave. Jerusalénpe niko oĩ peteĩ piléta pe okẽ hérava Ovecha ypýpe. Judíokuéra ombohéra Betzatá ha ijerére oguereko 5 ogaguy’i. Umi ogaguýpe oĩ heta hasýva opaichagua, oñeno joáva hína upe rupi. Oĩ ohecha’ỹva, oĩ ikarẽva ha paralítiko hamba’e. Umíva apytépe oĩ peteĩ kuimba’e ojapómava 38 áño imba’asy omoñeno hague chupe.

Jesús ohechávo chupe upépe oñeno hína, ha oikuaávo aréma péicha oiko hague, he’i chupe: — Rekuerase piko.

Pe kuimba’e he’i chupe: — Karai, ndarekói niko avave che moinge haguã pe ýpe oñemongu’e vove. Ha apoñývo ahávo aike haguã, oĩma itenondéva che rehe.

Jesús he’i chupe: — Epu’ã. Ehupi nde rupa ha eguata.

Upepete voi pe kuimba’e okuera, ohupi hupa ha oguata. Pytu’uha ára upe jave, ha umi
hudíokuéra ruvicha he’i chupe:
— Pytu’uha árape niko ñaime. Mba’éicha piko aipo eraháta nde rupa.

Pe kuimba’e katu he’i chupekuéra: — Upe che monguera vaekue niko he’i chéve: “Ehupi nde rupa ha eguata.”
Ha’ekuéra oporandu chupe: — Ha mávaiko he’i ndéve: “Ehupi nde rupa ha eguata.”

Pe kuimba’e katu nde’ikuaái mávapa omonguera kuri chupe. Jesús niko okañýma génte atýra apytépe. Upéi katu Jesús ojuhu pe kuimba’épe tupaópe, ha he’i chupe: — Rekueráma. Eñeha’ã anivéma ne rembiapo vai, cháke ivaivéva ojehúne ndéve.

Pe kuimba’e oho umi judío kuéra ruvicha rendápe ha omombe’u chupekuéra Jesús hague pe omonguera vaekue chupe. Ha Jesús ojapo haguére ko’ã mba’e pytu’uha árape, umi judíokuéra ruvicha oñemoĩ hese. Jesús katu he’i chupekuéra: — Che Ru niko ndopytu’úiva hembiapópe, upévare che ave amba’apo.

Upépe katu ipochyvéma umi hudío kuéra ruvicha, ha ko’ýte ojukase hikuái Jesúspe. Nda’ija’éi hese hikuái, Jesús nombyaretéigui pytu’uha ára. Ha upéi ave, Jesús he’i Ñandejára ituvaha.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Heta tapicha niko nomýi, ndoikéi atýpe, nomboguatái tembiapo, noñeha’ãi oguata hapicha ndive. Jahecha Hesu ojuhu peteĩ kuimba’e oñenóva ymáma hasy katúgui ha oporandu chupe okuerasépa térãpa opytasénte péicha oñeno hína upépe oñembyasyka. Ha pe tapicha oñemoĩ ramo jepe okausa ambuépe, ha he’i ha’e anga ndokueraiha ndorekóigui oñangarekóva hese, Hesu he’i chupe ha’ete voi opu’ã haguã ijehegui, ohupi pe hupa ha oñemoĩ oguata.

Ha péicha avei Hesu he’i ñandéve hína che irũ ha nde che reindy: Ani reha’arõ avave ou nde rupi ha nemboguata ijyva ári. Ndete voi ehupi vaerã nde problemakuéra ha eguata heseve, ani eñeme’ẽ, epyta eñeno eñembyasy ha ejeplaguea hína pe tape yképe. Hesu oĩ nde ykére ha ne pytyvõ, nemokyre’ỹ epu’ã ha eiko haguã hendive eguatávo nde rapicha kuéra ndive, tembiapo, ñembo’e, jerovia ha mborayhúpe.

Pa’i Alberto Luna.