Ñahendu Hesu Ñe’ê. Miércoles 12 de febrero

Escucha el evangelio y la reflexión en: https://youtu.be/ym8e3Zaen1o

Miércoles V Tiempo Ordinario Marcos 7, 14 – 23.

Upéi Jesús ohenói opavavépe ha he’i chupekuéra: — Pe che rendúke opavave,
jahecha nahesakãipa peẽme ko ha’étava.

Mba’eve ja’úva niko na ñane mongy’ái. Umi mba’e ñane korasõgui osẽvante pe ñane
mongy’áva. Peẽ pende apysáva, pehendu.

Jesús oike hógape ha oheja opavavépe okápe. Upépe idisípulo kuéra oporandu chupe
mba’épa pe he’ise vaekue. He’i chupe kuéra ha’e: — Peẽ ave piko ndapeikuaái. Mba’eve
oikéva ñande juru rupi niko ndaikatúi ñane mongy’a. Ndohói niko ñane korasõme.
Ñande retepýpente oho ha upéi osẽ jey ñande hegui.

Upéicha he’ívo niko Jesús he’ise opaichagua tembi’u ipotĩha. He’i avei: — Pe osẽva ñane korasõgui, upéva hína pe ñane mongy’áva. Ñane korasõgui niko osẽ opa mba’e vai,
jejuka, ñemyakãratĩ, teko vai, monda, japu, ha ñe’ẽ rei ñande rapicháre. Opa ko’ã mba’e
vai osẽ ñane korasõgui ha ñane mongy’a.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Kuimba’e térã kuña ipy’a porãva ha heko marangatúva ndojekuaái ijapére, ijaóre, térã umi mba’e orekóvare, pe ijapekue niko sapy’ánte tuicha ñanembotavy.

Oiméramo ñande rapicha oúva campáñagui, térã oikóva bañádope, ndaijapellido guasúi,
okaru pokã, oikóva oga’ípe, oñemondéva ao ha sapatu ndaha’éiva umi imarkapáva,
indígena mba’éramo katu, mbyky voi oñembo’yke haguã ha ojerereko haguã mba’eve
ndovaléi ramo guáicha. Oĩ voi okyhyjéva mboriahúgui mondaha ramo guáicha.

Ha oguahẽramo peteĩ paraguaygua, oikova centrope, barrio residencial, ijao porã
imarkapáva, áutope oguatáva, hóga porã, ijapellido joapy, itítulopa, ostudia colegio
porãme, oho universidápe, ojerereko karai guasúramo guáicha. Oĩ avei omosaingóva
kurusu, medalla ha rosárioma katu ijajúri, ojovasáva y karaípe oikévo tupaópe ha
ijapéguio ha’ete ku imba’e porãtava mante voi. Opáichavo pe ñande apekuénte
nañandeapói, ivai ramo nde’iséi pe ñande py’a ivaitaha, ha iporãramo nde’iséi pe ñande
py’a iporãtaha.

Ñama’ẽ va’erã mba’épa osẽ ñande py’águi, mba’épa ñañandu ñande rapicháre, ha mba’eichagua ñe’ẽpa jaiporu, osẽpa tie’ỹ ha ñe’ẽ rei ñande jurúgui, terãpa pochy ñande py’águi, jareko asýpa ñande rogagua, ñamoakãratĩpa ména térã tembireko, ñamondápa ñande rapichápe, ndajaipe’áipa chugui imba’éva, nosẽipa ñande py’águi japu ombotavýva ñande rapicha.

Hesu ñanekonvida hína che irû ha che reindy, ñañangarekove haguã ñande py’áre, ani jajepy’apy ñande apénte ñambojegua, ha ñane korasõ rogapy katu puerkésa opyta ñande hegui.

Pa’i Alberto Luna.