Ñahendu Hesu Ñe’ê. Miércoles 21 de agosto.

Ñahendu Hesu Ñe’ê. Miércoles 21 de agosto.

                                                                  Mateo 19, 30 – 20, 16.

Upérõ Jesús he’i idisípulo kuérape:   heta umi ko’ágã itapykuéva, tenondete oguapýta. Ha umi ko’ágã itenondéva, itapykuéta.

  Ñandejára Rréino niko ojogua ku kokue járape osẽva pyharevete ohekávo omba’apo vaerã chupe.   Oñemoĩ rire hikuái peteĩ ñe’ẽme mboýrepa omba’apóta hikuái chupe, omondo chupe kuéra ikokuépe.   Asajeve katu osẽ jey hógagui, ha ojuhu jey omba’aposéva.   He’i chupe kuéra, “Tapeho pemba’apo che kokuépe, ha hekópe apagáta peẽme”. Ha oho hikuái.   Pe asaje pytévo katu, pe óga jára osẽ jey voi, ha ka’aru asajévo péichante avei ojapo. Ha omondo ikokuépe opa omba’aposéva.   Upéi katu ka’aruete, osẽ jey voi ha ojuhu oĩ reíva hína. He’i chupe kuéra “Mba’éreiko peñembo’y joa hína ko’ápe pemba’apo rangue mba’e.”   He’i chupe hikuái: “Ha ndorojuhúi niko avave ore momba’aposéva.” Osẽ he’i pe karai chupe kuéra: “Tapeho pemba’apo che yvýpe.”  Ka’aru pytũvoma pe kokue jára he’i icapatazpe, “Ehenói opavavépe ha epaga chupe kuéra hembiapóre. Eñepyrũta epaga umi tapykueve oho vaekuépe, ha ipahávo umi tenondeve oho vaekue.”   Ha oñemboja umi ka’aruete oike vaekue, ha ojepaga chupe kuéra ku pyharevete oñepyrũ ramo guaréicha hikuái.   Upéi katu, oñemboja umi pyhareve oike vaekue, ha oimo’ã ojepagavetaha chupe kuéra. Ha peteĩchante ojepaga opavavépe.   Ha ojepagávo chupe kuéra, oñepyrũ ipochy pe óga jára ndive.   He’i chupe “Umi ka’aru oho vaekue niko sapy’amínte omba’apo ha repaga chupe kuéra oréveicha. Ore katu, kuarahy resẽ guive kuarahy reike peve ore ry’ái pe kuarahy akúpe.”   Pe óga jára katu osẽ he’i chupe kuéra, “Che irũ, mba’e ivaíva piko ajapo nde rehe. Ndajapytái nga’u piko ra’e mboýpa apagáta ndéve kuri.   Oñeme’ẽma niko ndéve nerembiapo repykue. Terehóntema nde rógape. Che ame’ẽsérõ pe tapykuete oike vaekuépe ndéve ame’ẽháicha piko mba’e ndéve.   Che niko ajaposéva ajapo kuaa che plátagui. Ha piko nde pochýta che ndive, che mba’e porã haguére. 

  Upéi he’i Jesús: “Ha péicha, umi ko’ágã itenondéva itapykuéta, ha umi itapykuéva katu oñemotenondéta.”

Ñandejára Hesukrísto ñe’ë. 

ÑAMBOGUEJY ÑANDE REKOVÉPE…

Oĩ ymaite guive oguatáva tupao ha komunidápe ha oĩ oike ramóva, sa’i gueteri ojekuaáva hembiapokue. Umi militar ha umi báncope niko, ymave guive omba’apóva, oñeasende, isueldo porã ha itenonde oike ramóvagui. 

Ñandejára kokuépe ndaupéichai. Ha’e omotenonde umi oñepyrũ ramóvape, ha ipahápe ohechakuaa umi ymaite guive omba’apóva hendive. Opavavépe niko ome’ẽ hembiapo repykue peteĩchapa. Ndaipóri pa’i terã obispo, hermana téra animador yma guare, itenondéva oñepyrũ ramóvagui ha sa’i gueteri oka’apívagui Ñandejára kokuépe. 

Iporãiténe, che irũ ha che reindy, ñamotenonde umi oike ramóva oguata Hesu rapére. 

Ñamokyre’ỹ, jahecháramo, ikatu haguãicha oñandu jaguerohoryha upe ojapóva, michĩramo jepe. Pe he’iséva niko ndaha’éi tembiapo tuicha térã michĩva, pe ovaléva hína jajeity ñande py’aite guive jajapo Ñandejára ojeruréva. 

Pa’i Jasy.