Ñahendu Jesús Ñe’ẽ. Sábado 23º Durante el Año

Escucha el evangelio y la reflexión en: https://youtu.be/CVjvvcHls_A

Sábado 23º Durante el Año Lucas 6, 43 – 49

Upérõ Jesús he’i idisípulokuérape: Yvyramáta porã niko ndaikatúi hi’a vaívo. Upéicha ave, ndaipóri yvyramáta vai hi’a porãva. Yvyra máta niko jaikuaa hi’áre. Ndajaipo’ói niko ígo jukérigui, térã parral ñana reígui. Umi ipy’a porãva niko, mba’e iporãvante he’i. Ipy’apýpe voi imba’e porãgui. Umi heko añáva katu, ivaívante voi he’i. Ipy’apýpe voi oĩ ivaíva. Ha upe ipy’apýpe oguerekóvagui, upévaguinte oñe’ẽ.

Mba’ére piko peje peikóvo chéve “Ñandejára, Ñandejára”, ha ndapejapói che ha’éva peẽme. Oime raẽva oúva che rendápe, ohendúva che ñe’ẽ ha ojapóva che ha’éva, niko ojogua ku hogarã omopu’ã va’ekuépe ita ári. Ojo’o pypuku porã raẽ, ita ohupyty peve, ha upépe ae omboguapy ha omopu’ã hogarã. Ama oúvo, ha umi y ou oñenupã hógare katu, hóga nomýiri ipyenda hatãgui.

Umi che rendúva ha ndojapóiva upe che ha’éva katu, ojogua ku omopu’ã va’ekuépe hogarã yvyku’i ári reípe. Y opu’ãvo ha ou oñenupã pe hógare katu, oity paite ha sarambikue opyta.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

“La santorã, santopáma”. Ñahendu oje’e upérupi. Péicha niko he’ise lo mitã hina “péicha guarãntema ñande”, ha marãpa ñañeha’ãitereíta ñasẽ haguã upe ñaime hágui. Jaikónte jaikuaa háicha.

Jesús katu ombojoja ñande rekove yvyramáta rehe. Yvyramáta iporãva hi’a porã, he’i, ha pe ñana vaíre katu ndajajuhúi iporãva, ñuatĩ ñandekutúva mante heta hese. Ñande ñahendu ramo Jesús ñe’ẽ, jalee ha ñañemongeta hese oñondive, jahayhu ha ñamboguapy ñande jehe, jaheja oñeñotỹ ñande rekovépe umi semílla hi’a porãtava ñandéve.

Nañahendúi ramo Ñandejára ñe’ẽ ñande voi jaheja ñanegana ñana, javorái ha ñuatĩndy, ha upépe katu ndaikatúi ñaha’arõ iporãva. Ndaha’éi hina, he’i háicha lo mitã, oimembámava voi ñande pype mba’éichatapa. Nahániri. Ñande hína jaiporavo mba’épa ñañemitỹ ñande rekovépe, ha pe ñañemitỹ haguéicha, upéicha ñamono’õta hi’a.

Jesús ombojo’ave ñandéve peteĩ káso tapicha ojogapóva rehegua. Pe Ñandejára ñe’ẽ rendúpe omopu’ãva hóga ha ifamília ha oñeha’ãva ojapo upe Jesús he’íva, péva omosimiénto porã hekove. Ha ou vove oñeaproblema, oreko moõguipa oñeprendéta. Pe ohendúva Ñandejára ñe’ẽ ha upéi iñakãre jeýnte oikóva katu, ou vove jehasa asy, raudal ñarõicha ombeti hese, ombotyryry ha ombyapajeréi. Sarambikuépe oheja hekovemi. Ha mba’etekópa che reindy ha nde che irũ la ñande róga cimiento.

Ñambopypukúpa hína jahávo Ñandejára ñe’ẽ rendúpe. Toguapy porã ñande róga ha ñande rekove, ita ári ñaime haguãicha ou vove raudal.

Pa’i Jasy.