Ñahendu Jesús Ñe’ẽ. Sábado 1º Pascua

Escucha el evangelio y la reflexión en: https://youtu.be/BDPP17uXYAw

Sábado 1º Pascua Marcos 16, 9 – 15.

Upe domíngo pyhareve ko’ẽvo, Jesús oikove jey rire árape, ha’e ojechauka raẽ María Magdalénape. Jesús niko omosẽ va’ekue chugui 7 demóño. María Magdaléna oho ha omombe’u Jesús irũnguérape Jesús oikove jeýma hague. Ojuhu chupekuéra oñembyasy ha hasẽ joa hína Jesús omano haguére. Ha ohendu ramo jepe hikuái Jesús oikove jeýma
hague ha María Magdaléna ohecha hague chupe, ndogueroviái hikuái.

Upe rire Jesús ojechauka mokõi idisípulope oguatáva ohóvo peteĩ ñu rupi. Umi mokõi oho omombe’u hapicha kuérape, ha umívape ndogueroviáinte avei hikuái.

Ipahápe Jesús ojechauka umi 11 disípulope okaru jave hína ha’ekuéra. Omongavaju chupekuéra ijerovia’i haguére ha ipy’a hatãgui, ndogueroviaséi haguére hikuái umi ohecha va’ekue Jesúspe oikove jey rire. Upéi he’i chupekuéra: – Tapeho opa rupi ko yvy apére ha pehenduka opavavépe ko marandu porã.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ou ramo ñande rapicha jaikuaa porãva omombe’u ñandéve umi mba’e guasu ohasa térã ojapo vaekue Ñandejára rérape, ñande ndajaroviapái. Ja’éne ñande py’ápe, kóva ou opurease ko’ápe, oñemomba’e guasuse chéve. Ñañakãmbovava ha ñapensa:

Mba’e Ñandejára piko oñe’ẽta kóvape. Jarovia haguã umíva ha’eteku jaipotáva voi Ñandejáraite oguejy ñane renondépe.

Ko’ápe ñahendu mba’éichapa Hesu ojevale ñande rapicháre, ñane irũ comunida guáre omoguahẽ haguã ñandéve upe oipotáva jaikuaa. Ha Hesu omongavaju apóstolkuérape ndojeroviái haguére iñirũre, nohenduséi haguére mba’épa oñandu ha ohasa.

Natekotevẽi ha’ete ojechauka, térã oñeñanduka ñandéve, ñahendukuaa vaerã Ñandejára ñe’ẽ ñane irũ ñe’ẽme.

Ñande niko jarovia Hesu oikoveha ha oimeha ñane ndive ko’ãga avei, ndaha’éi ymaiténte ha upéi oho yvágape upépe oguapy ha oma’ẽ ñande rehe. Jarovia oimeha ñane ndive ko’ãgaite, he’i haguéicha: “Che aiméta pene ndive opa ára”.

Jesús oñeñanduka hína oikóvo hetápe, kuña ha kuimba’épe, mitã ha tujápe, oñehenduka chupekuéra, ombopyahu heta ñande rapicha rekove. Umíva ñande ñahendukuaa va’erã, ani ñande py’a ratã, ani upéi ou Hesu ñandeja’o ndajaikuaái haguére chupe, ndajaroviái haguére ha’e he’ikáva ñandéve ñande rapicha rupive.

Mamópa reñandu aipóramo che irũ ha nde che reindy, oime Hesu oñe’ẽ ha oñeñanduka ndéve hína ko’ãgaite. Máva ñe’ẽ ha máva rekove rupivépa nerenói ha ohechauka ndéve nemba’erã hína. Mba’épa reñandu.

Pa’i Alberto Luna.