Ñahendu Hesu Ñe’ê. Jueves 16 de enero
15 enero, 2020Ñahendu Hesu Ñe’ê. Lunes 13 de enero
20 enero, 2020
Escucha el evangelio y la reflexión en: https://youtu.be/odPoi3IW23M
Viernes I Tiempo Ordinario Marcos 2, 1 – 12
Mbovy ára riremínte Jesús oike jey Cafarnaúmpe. Ojekuaávo ha’e oĩha hógape, hetaiterei umi oñembyatýva ha ndaijavéi upe okẽ renondépe, ha ha’e oñe’ẽ chupekuéra.
Upérõ 4 kuimba’e ogueru peteĩ paralítikope. Ha ndaikatúigui oguahẽ Jesús rendápe hetágui umi upépe oĩva, ombokua hikuái pe óga técho ha’e oĩháme, ha upe rupi omboguejy hikuái pe hasývape, hupápe. Jesús ohechávo mba’eichaitépa ha’ekuéra ojerovia hese, he’i pe hasývape: Che ra’y, ojeheja reíma ndéve nde pekádo.
Upépe, umi Moisés léi mbo’eha oguapyvahína, he’i ipy’apýpe: “Mba’ére piko kóva péicha oñe’ẽ. Ojahéi niko Tupãre, hendaguépe oĩrõ guáicha. Tupã añónte niko ikatu oheja rei ñandéve ñane rembiapo vaikue.” Ha Jesús oikuaágui mba’épa he’i hína hikuái ipy’apýpe, oporandu chupekuéra: Mba’érepa péicha pepensa. Mba’épa ndahasyive, ja’e ko paralítikope: “Ojeheja reíma ndéve nde pekádo”, térãpa “Epu’ã. Ehupi nde rupa ha eguata.”
Néi, ahechaukáta peẽme ko kuimba’e ikatuha oheja rei oimeraẽvape hembiapo vaikue.Ha upévo he’i pe paralítikope: Ndéve ha’e: ‘Epu’ã. Ehupi nde rupa ha tereho nde rógape.’ Upépe, pe paralítiko opu’ã, ohupi hupa ha osẽ upégui opavave renondépe. Ha opavave ohecha ramo, ha omomba’e guasu Tupãme he’ívo: Peichagua mba’e ndajahecháiva araka’eve.
Ñandejára Jesucristo ñe’ẽ
ÑAMBOGUEJY ÑANDE REKOVÉPE
Ñande rapicha ojedesgraciáramo, oikotevẽ ramo operasión térã pohã hepyetereíva niko oiko jepi vesíno ha pariénte apytépe ñepytyvõ, ndorekóiramo oho haguã oñepohano, ojehecháne omoguahẽva mba’yrúpe dóctor rendápe.
Ñahendu peteĩ paralítikope oraha hapicha oiporiahuverekóva, omoguahẽse etereígui Hesu rendápe opa ombokua pe óga técho omboguejy haguã henondépe, ndaikatúigui ohasa hénteta apytépe. Túicha ojerovia Hesúre hikuái ha ndojevy mo’ãi mba’eveichavérõ omoĩ mboyve pe hasýva henondépe.
Hesu ohechávo mba’eichaitépa ojerovia, oiporiahuvereko pe hasývape, oipohano raẽ ipy’apy operdonávo ichupe, upéi katu oipohano hete ha omopu’ã oguata ijehegui.
Ikatúko hína che reindy ha nde che irũ oime avei umi ñande rapicha ndoguata porãiva, nosẽiva tapépe, ndaikatúiva opu’ã ipýre, oikotevẽva hína ñande mba’e ñañeha’ã hese ha jaraha Hesu renondépe. Toñemboja hese, tohendumi Hesu ñe’ẽ, toikuaa chupe, jaheja Hesúpe toperdona ichupe, toipohano ikorasõ ha tomopu’ã jevy.
Pa’i Jasy.