Ñahendu Hesu Ñe’ê. Viernes después de Ceniza

Escucha el evangelio y la reflexión en: https://youtu.be/WqoIyKuF6UA

Viernes después de ceniza Mateo 9, 14 – 15.

Juan Bautista disípulokuéra oñemboja Jesús rendápe. Ha oporandu chupe: — Umi
fariséokuéra, ha ore ave niko, py’ỹi ro’ajuna. Nde disípulokuéra katu niko nahániri. Mba’éreiko péva.

Jesús he’i chupekuéra: — Omenda ramóva irũnguéra niko noñembyasýi pe ména
pyahu oĩ aja hendivekuéra. Nahániri. Oguãhẽne jepe ára ha’e ojepe’ávo ichuguikuéra.
Upépe ágã o’ajunáne hikuái.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oĩ niko he’íva ndohoseiha tupaópe, ñembo’e hápe, upépe oñeime haguére tova puku ha tovasýpe. Ndovy’ái okirirĩ guasu joáva apytépe, upéva rangue ohoseve partido hápe, ikatuhápe osapukái, ijayvu, opuka puku, térã katu fiesta hápe, oĩ hápe musikapu porã, ñemongeta kyre’ỹ, tembi’u, ñamboy’umi vaerã, jeroky opavave ojehe’a hápe.

Juan Bautísta irũnguéra ou Hesu rendápe ha he’i ha’ekuéra ha umi fariseo ojapoha ajúno, ha oikuaase mba’érepa Hesu ha idisípulo kuéra ndojapói. Heta niko oime añete oimo’ãva ha he’íva voi pe tupaópe jahávo, ñañembo’évo ha ñande atývo Ñandejára rérape, ndaikatuiha ñaime vy’a guasúperamo guáicha. Ndaikatúi ñande ayvu, ñamýi eterei, ñañe’ẽ hatã jepe. Ñaime va’erãha karai guasu ha kuña karai guasúicha.

Ha’eteku oipotáva voi jaiko ñañepomoĩ ñañembo’e puku ha ñañesũvonte. Hesu he’i umi oguatáva hendive ndaha’éiha opa ára oñembyasýva oikóvo. Umi oguatáva hendive oĩha peteĩ fiésta ñemendáperamo guáicha he’i, ovy’a ha horýva oñondive, opuka ha ojehe’áva, ojokuaáva ha oñuguaitĩva py’a porãme, ojoecha ramo ha okarúva oñondivepa, opurahéi ha horýva. Opaichavo Hesu he’i avei oguahẽta ára ha’e ojepe’ávo iñirũ nguéra apytégui, ha upépe ohasa asytaha.

Ha ajépa añete nde che reindy ha che irũ. Pe ñande rekove niko ogueru voi ijehegui araka’épa ñañembyasýta. Opa mba’e itiémpo, natekotevẽi ñande jaheka ha ñamoĩ ñande apére ita pohýi. Ou vove jehasa asy tiémpo ñamboguata py’aguapy ha jerovia pope ñande kurusu, ha ou vove ñandéve jehasa porã, javy’a ñande rapicha ndive, ja’agradese Ñandejárape imba’e porãre ñanendive.

Pa’i Alberto Luna.