Ñahendu Hesu Ñe’ê. Viernes VI de Pascua

Escucha el evangelio y la reflexión en: https://youtu.be/79n7bhtXlcs

VIERNES VI DE PASCUA

San Juan 16, 20-23a.

Oguãhẽ mboyvemi ára Jesús ohejávo ko yvy oho haguã itúva rendápe, he’i idisípulokuérape: Añete ha’e peẽme, pene rasẽ ha peñembyasy vaerã ágã, upe aja katu, yvypórakuéra ovy’apa joa vaerã. Ha peñembyasy ramo jepe, upéi pene ñembyasy hendaguéta vy’ápe.

Peteĩ kuña imembýtarõ niko heta ohasa asy oguãhẽvo imemby haguã ára. Imemby rire katu, ovy’a ogueru haguére peteĩ mitã ko yvy ári ha hesarái ohasa asy hague. Péicha avei peẽ, ko’ágã oĩ pende py’a jopýva. Ágã che aju jey vove pohechávo katu, pene renyhẽne vy’águi ha avave ndaikatu mo’ã oipe’a upéva pendehegui. Upéva upe árape napeporandu mo’ã véima chéve mba’eve.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Ñañeha’ã ningo ñande rekovére ára ko’ẽre, oime omba’apo, ostudiáva, opu’ã va’erãva ko’ẽ mboyve, ára ro’y ha ára akúpe, oime ohóva mombyry hógagui omba’apo hápe, ndaipóri je’u rei hína, hendy kavaju resa, he’i lo mitã. Amo ipahápe katu jahupyty ramo upe jahekáva niko nañambyasýi ñañeha’ã hague, javy’a uvei ñande pu’aka ha ñande katupyry haguére ñamohu’ã upe ñane rembiapo.

Hesu ningo heta oñeha’ã vaekue ohechauka haguã Ñandejára rembipota, ha oñandu
avei raka’e hendy kavaju resa hendive, omongora rupi ichupe ohóvo umi hese ndaija’éiva.

Ha ojopy paitéguima hina ichupe hikuái ohechakuaa ha’e mbykymaha haperã,“oguahẽmaha
el tiempo cumplido” he’i háicha Emiliano, ndohoséi ramo jepe oho mante va’erãha.

Tuicha oguapýramo jepe ipy’áre upe jehasa asy oha’arõva ichupe, tuicha avei upe esperánsa Tupã onohẽtaha mba’e porã ijehasa asy ha imanógui jepe. Ha upévare oñembojoja hemiandúpe peteĩ kuña ryeguasu imemby potáva rehe, ojepy’apýva oikuaa porãgui ohasa asytaha, opáichavo oikuaa avei upe jehasa asy rire ohupitaha ijyva ári imemby.

Pe jehasa asy rire oikuaa oñeme’ẽtaha ichupe peteĩ tekove pyahu oguerútava tuicha vy’a ichupe ha hóga guápe, ha upéva oguahẽvo hesarái ijehasa asykuégui.

Upévare Hesu noñemoĩri hasẽ ha oñembyasyka oikéta haguére karaguata týpe.

Ohechakuaáma ramo ikatuha omano jepe, ojerovia Tupã oikuaaha ojapóva ha oñemoĩvo
ipópe, oñe’ẽ umi apóstol kuérape ikatu haguãicha ha’ekuéra avei oma’ẽ mombyryve, ha
oha’arõ upe tekove pyahu iporãvéva Ñandejára omoheñóitava Hesu jehasa asy rupive.

Oiméne nde che reindy, oime ramo nde sy, eikuaa hína upe jehasa asy nememby ramo guare ha upe vy’a reñandu vaekue uperire. Ha oiméne avei nde che irũ eikuaa mba’épa he’ise nderesarái nde jehegui eñeha’ãvo umi rehayhúvape eme’ẽ haguã oipota ha oikotevẽva. Upéva ningo Hesu ojapo, nahakate’ỹi ijehe ha nombyasýi hekove jepe tuicha ñande rayhúgui.

Pa’i Alberto Luna.