Ñahendu Hesu. Sábado después de Ceniza

Escucha el evangelio y la reflexión en: https://youtu.be/L-3rcS6m7RE

Sábado Ceniza rire

Lucas 5, 27 – 32

Jesús osẽ oho, ha hesaho sapy’a peteĩ impuésto okovrávare. Matéo héra, ha oguapy
hína omono’õ pláta pe tape ári. Jesús he’i chupe: — Eju jaha.

Ha Matéo ohejapa oguerekóva, ha oho Jesús ndive.

Hógapema, Matéo ojapo peteĩ karu guasu Jesús rérape. Upépe ijaty hapichakuéra impuésto okovráva, ha Matéo kuaaha. Fariséokuéra ha umi Moisés léy ombo’éva katu oñepyrũ oñe’ẽ api hikuái Jesús disípulo kuérape.

He’i hikuái: — Mba’ére piko peẽ pekaru umi impuésto okovráva ñandéve ndive, ha tapicha reko vai atýrandi.

Jesús katu he’i chupe kuéra: — Hesãiva niko noikotevẽi médico, hasývante. Che niko
ndajúi ahenóivo umi heko jojávape. Che aju ahekávo iñangaipávape ojere haguã Ñandejára gotyo.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Mávapa pe oikotevẽvéva ñañeha’ã hese ñanohẽ haguã tape porãre. Jaháramo ñañe’ẽ Ñandejárare umi oúva voínte tupaópe ndive, jaháramo ñañembo’e umi oñembo’éva voínte ára ko’ẽre ndive, ivevuivéta ñane rembiapo. umíva oguerohorýta pe Ñandejára ñe’ẽ ha ñanemoguahẽ porãta.

Jaikéramo umi ndoikuaáiva voi mba’eve Ñandejáragui, umi imombyryvéva tupaógui apytépe, ñembo’e jepe ndoikuaáiva, hesaite ha isagua’áva voi cristiano rapégui, umi iraríva Tupã ñe’ẽ rendúgui, umíva ndive ijetu’uve jaguata. Umíva oikotevẽve.

Sapy’ánteko japytasénte upe ñande kora’ípe, upe jajokuaa hápe. Ñande grupo jaguatáva voi comunidápe, ñande rógapente, upépente jajere ojuehe ha nañasẽséi jaheka umi okañýva ñúre, oikéva javorái kuápe, umíva hina oikotevẽve umi oguata porãmavagui voi.

Hesu niko oike umi hekove vaíva pa’ũme jahechápa noguenohẽi chupekuéra pe karugua opa’ã hágui. Ha ojehe’ávo umi tujúre oikóva, hekove ky’áva ndive, ohypýi avei chupe pe tuju.

Ha upéva ohecha umi fariseokuéra, umíva niko oimo’ã ojapopa haguére Ñandejára léi, oñembo’e puku haguére, ikatúma ojeguaru hapicha heko ky’ávagui ha noñemonái umi heko vaíva rehe. Hesu katu oguejy pe yvate oĩ hágui, ojehe’a umi ho’a va’ekue ndive, ojykeko hese kuéra omopu’ã haguã.

Mba’épa nde reñandu che irũ, nde ikatuneha ejapo, ha nde che reindy.

Mba’éichapa ikatúne nde avei eñemboja eipytyvõ nde reikuaávape hína oguataha tape
vaíre. Hesu ojapo haguéicha oime vaerã katuete ñande avei jajapokuaa, aje.

Pa’i Alberto Luna.