Ñahendu Hesu. Sábado Semana 12a TO

Escucha el evangelio y la reflexión en: https://youtu.be/66N9uxENRVE

Sábado Semana 12^a TO                        

                                          Mateo 8, 5 – 17.

Jesús oikévo Cafarnaúmpe, peteĩ kapitan oñemboja hendápe. He’i chupe:

— Mbo’ehára, che rembiguái niko oime ógape, ijapa paite ha oñeno hasyete.

Jesús he’i: — Aháta amonguera chupe.

  Pe kapitan katu he’i: — Mbo’ehára, mávaiko che, nde reg̃uahẽ hag̃ua che rógape. Eréntena okuerataha, ha che rembiguái okueráta. Che niko aĩ che ruvicha po guýpe, ha areko avei che poguypegua. Peteĩme ha’érõ oho hag̃ua, oho. Ambuépe ha’érõ ou hag̃ua, ou. Ha ha’érõ che rembiguáipe ojapo hag̃ua ha’éva, ojapo.

   Jesús ohendúvo upéva ohecha ramoite. Ha ojere he’i umi hendive oĩvape:

— Añete ha’e peẽme, tetã Israélpe ndajuhúiva peichaite peve ojeroviáva Tupãre.  Ha ha’eve peẽme. Heta oĩta oúva opáguio ko yvy ape árigui. Umíva oguapy vaerã ág̃a mesápe Abraham, Isaac ha Jacob ndive pe vy’a guasu oikótavape Ñandejára Rréinope.  Umi oĩ vaerãva upépe katu oñemosẽmbáne okápe pytũmbýpe. Upépe ojahe’o soróta hikuái, hãi mante omopururũne.

   Upéi, Jesús ojere he’i pe kapitánpe: — Terehóntema nde rógape. Upe erovia haguéicha toiko ndéve. Ha upévo okuera pe hembiguái.

  Jesús og̃uahẽ Pedro rógape, ha ojuhu Pedro suégrape tupápe, tuicha iñakãnundu. Jesús opokóvo ipóre, pe akãnundu opi chugui. Upévo, opu’ã ha oñemoĩ oservi Jesúspe.

  Og̃uahẽ pyhare, ha ojereraha Jesús rendápe umi oĩva demóño poguýpe. Iñe’ẽmente Jesús omosẽ umi demóño, ha omonguera avei opa hasývape.    Péicha ojehu, oiko hag̃ua hekoitépe ku proféta Isaías he’i va’ekue: 

“Ha’e oipe’apa ñane mba’asy ha ñane monguerapa.”

Ñandejára Jesucristo ñe’ẽ

ÑAMBOGUEJY ÑANDE REKOVÉPE

            Oime ningo ñande rapicha ndaha’éiva la itupao rayhu etéva, noñembo’e guasúiva. Ha sapy’ánte umíva apytépe jajuhu avei ipy’aporã ha oñeha’ãva oipytyvõ hapichápe. Oime avei ñande rapicha ikatólikova, oñembo’e meméva, ha ñaimo’ã’ỹete hágui ou tuicha omondoro. Hesu he’i heta ndoguatáiva católico ha cristiano ndive, ambue religión ha tetãygua oñehenoitaha ára pahápe oguapy haguã Ñandejára mesápe. Ha heta ikarai ha ojeroviáva ijehe cristianoha katu oñemosẽta ha ohóta Aña retãme.

            Ñama’ẽ mamópa ñapyrũ che reindy ha nde che irũ. Anínte jajerovia iterei ñande jehe, ñande pojaitaha yvágare mba’e. Jajepokãnte Hesúre, ñañakaity ha jaju ñande ave ou haguéicha ko kuimba’e ha ja’e chupe: Ñandejára Hesukrísto, máva piko che, romoguahẽ haguã che rogapýpe, eréntena peteĩ ñe’ẽ ha cheresãimane apytávo.

Pa’i Alberto Luna.