Ñahendu Hesu. Sábado V Durante el Año

Escucha el evangelio y la reflexión en: https://youtu.be/AuiO0_hRyh8

Sábado 5. Durante el Año

Marcos 8, 1-10

Umi árape, heta jeýma umi ijatýva Jesús oĩháme. Ha ndoguerekóigui hikuái ho’u va’erã, Jesús ohenói idisípulope ha he’i chupekuéra:  — Aiporiahuvereko niko ãvape. Ojapóma niko 3 ára oĩha ko’ápe chendive, ha ndoguereko véima ho’u vaerã hikuái. Amondo ramo hógape py’a nandi, ipy’a mano mba’e vaerã ágã tapére. Oĩ niko mombyrýgui oúva.

 Idisípulokuéra he’i chupe: — Moõiko jajuhúta tembi’u ñamongarupa haguã ko’ãvape. Árupi niko ndaipóri oikóva.

  Jesús oporandu chupekuéra: — Mboy pan piko pereko.

— 7. He’i hikuái.

  Ha Jesús omboguapy yvýpe opavavépe. Ha ojagarra umi 7 pan, ha oñembo’e Ñandejárape ohovasa haguã. Upéi, oipehe’ã ha ome’ẽ idisípulo kuérape, ha ha’ekuéra ome’ẽ opavavépe.

Oguereko avei hikuái mbovymi pira. Ha umívare avei oñembo’e Ñandejárape ohovasa haguã, ha ome’ẽ hikuái opavavépe.  Ha ho’u hikuái hyvatã meve. Ha hembyrégui katu ombyaty hikuái 7 ajaka renyhẽ.  Umi okarúva niko amo 4.000 rupi. Upéi Jesús omondo opavavépe hógape.  Ha’e katu ojupi kanóape idisípulo kuéra ndive, ha ojapi Dalmanuta gotyo.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

            Heta niko oĩ mboriahu ha oikotevẽva. Ñande jerekuévo voi ikatu jahecha ñande rapicha ohasa asýva ha ojejopýva, okaru pokãva, ndorekóiva hi’upyrã. Oĩma katu hasýva ndorekóiva oñepohano haguã. Ndaijaóiva, ndahógaiva, ndohóiva eskuélape.

Jahecha tuichaveha pe tekotevẽ upe ñande ikatúvagui jajapo ñaipytyvõ haguã ñande rapichápe. Ha jahechágui ndajaropu’aka mo’ãiha ñame’ẽ haguã opavavépe, ha jakyhyjégui avei ñande japytáramo guarã mba’eve’ỹre, sapy’ánte nañame’ẽi upe michĩmi ñande katúva ñame’ẽ haguã ha ndajajapói upe michĩmi jepe ijáva ñandéve jajapo ñaipytyvõ haguã ñande rapicha oikotevẽvape.

Hesu oñemoñe’ẽ ha ohekombo’e rire héta ijatývape, ohechakuaa hese kuéra ikangypamaha ñembyahýigui. Oiporiahuvereko asy ha oñemoĩ oheka tembi’u omongaru haguã chupe kuéra. Sa’i la orekóva hikuái, ipiru la teju.

Opáichavo upéva ndojokói Hesúpe. Ohupi ipópe pe sa’imi orekóva, oñembo’e Ñandejárape, ha hérape omboja’o ha ombohasa. Ha opavavépe ohupyty ha opa hemby pe tembi’u.

Mba’épa ere ichupe che irũ ha nde che reindy, ko Hesu ñanembo’évagui. Ñamboja’o haguã ñande rapicha oikotevẽva ndive, sa’iramo jepe pe jarekóva, téra katu michĩ ramo jepe upe ikatúva ñambohasa ichupe. Ñame’ẽramo Ñandejára rérape ñande py’aite guive, ñande rupytýne ha hembýne avei.

Pa’i Jasy.