Ñahendu Hesu. San Bartolome ára

Escucha el evangelio y la reflexión en: https://youtu.be/VpMK5nF1hQU

24 agosto: San Bartolome ára

San Juan 1, 43 – 51

Upérõ Felipe oho Natanael rekávo, ha he’i chupe: — Oime rojuhu ku Moisés ha umi profétakuéra imandu’aha ikuatiakuérape. Jesús niko héra, ku José Nazaretgua ra’y.

Natanael katu osẽ he’i chupe: — Nazarétgui piko araka’e osẽva iporãva.

Ha Felipe he’i chupe: — Eju ndete ehecha.

Ha Jesús ohechávo Natanaélpe oguãhẽva ohóvo hendápe, he’i: — Amo oúva hína Israelgua añetete. Hendive ndaipóri japu.

Natanael he’i chupe: — Mba’eichakue piko nde che kuaa.

Jesús he’i chupe: — Rohecháma voi kuri aje’i, ku reguapy ramo hína pe ígo mataguýpe, Felipe ne renói mboyve.

Natanael he’i chupe: — Mbo’ehára, nde niko Ñandejára ra’y. Nde hína Israel rréi.

Jesús he’i chupe: — Péicha piko ere ha’e haguére ndéve rohecha hague reguapýrõ hína ígo mataguýpe. Tuichaiteve mba’e katu niko rehecháne ágã.

Upéi Jesús he’i chupekuéra: — Añetéko ha’e peẽme. Pehecháne ágã yvága ojepe’a ramo ha Ñandejára ángelkuéra ojupi ha oguejy ramo che rendápe.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Oĩ niko umi ñande rapicha jaikuaáva oikóva tupao ha capilla rupi, ohóva mísa, aty hápe, retírope, oikóva grupo ha movimientope, catequista ramo, ñembo’e ýva umía. Ha umíva niko sapy’ánte oñemboja ñane konvida jaha haguã ñande avei ñahendu, jahechami ha jaikuaa mba’etekópa, jahecha ñande gustátapa.

Ha peichaite ndaje raka’e Felipe upe Hesu ohenói vaekue apóstolrã. Oho ndaje raka’e ivállepe ha ojuhu upépe isócio Natanaélpe. Péva ningo hína Bartolome la héra, opytátava upéi Jesús ndive ha oikótava ichugui avei apóstol Bartolome, ko árape ñanemandu’áva.

Bartólope avei ojekuaa. Ha tenonderã niko mitã Bartolo ndojeroviapái Felipe ñe’ẽre, irari imi voi katu la Jesús umíagui. Felipe opilla la Bartolo odudaha ha he’i ichupe: Ejúna ndete upéicharõ ehecha ha ehendu eikuaa haguã upéi. Oiméneko oñandúgui la isócio Felipe ikyre’ỹ etereiha Hesu umíva ndive, oho avei mitã Bartolo otantea ha ohechami mba’etekótapa hína la Hesu ha iñirũnguéra ndive ñaime.

Ha ohóma mitã Bartolo ojotopa Jesús ndive. Ohendu ichupe, oguapy oñemongeta puku hendive, omombe’u la ikáso ha mba’e. Ha upépe oikuaa rire Hesu etépe voi, ndaha’evéima hapicha ñe’ẽ rupi, oho haguére ha’ete voi ohecha katu.

Ohendu ha oñandu rire, opyta Hesu ndive upete guive. Ha oiko ichugui apóstol, umi 12 Jesús irũnguéra apytépe. Ha upéicha hína jaguata Hesu rapére che irũ ha nde che reindy. Ñañokonvida ha ñañomokyre’ỹ, upéi Ñandejárantema opoko ñande py’áre ha ñanemosã ijehe.

Pa’i Jasy.