Ñahendu Jesús Ñe’ẽ. Jueves Semana 12a Durante el Año

Escucha el evangelio y la reflexión en: https://youtu.be/6SS-BRO-90Y

Jueves Semana 12a Durante el Año

                                    Mateo 7, 21 – 29.

Jesús he’i opavavépe: ‘Ndaha’éikohina umi chéve he’íva: “Ñandejára, Ñandejára”, umi oikétava yvágape, Tupã Rréino pe. Umi ojapóva che Ru yvágape oĩva rembipota. Umívante oikéta.

Ágã oguãhẽvo pe ára paha, heta oĩta he’íva chéve “Nde rérape niko heta roñemoñe’ẽ vaekue. Nde rérape heta demóño romosẽ vaekue. Ha nde rérape rojapo vaekue heta milágro”. Ágã upévo, ha’éne “Che ndapoikuaái. Tapeho chéve águi peẽ Aña rymba.”

Upévare, pe ohendúva che ñe’ẽ ha ojapóva upe ha’éva, ojogua petei kuimba’e iñakã porãvape hogarã omopu’ã vaekue ita ári. Upéi ou oky ha okakuaa umi rraudal. Yvytu hatã oipeju ha ojejapipa pe ógare.

Péicharõ jepe ndo’ái, oñemboguapýgui ita ári. Pe che rendúva ha ndojapóiva che ha’éva katu, ojogua ku tekove tavýpe, omopu’ãva’ekue hogarã yvyku’i ári. Upéi ou oky ha okakuaa umi rraudal. Yvytu hatã oipeju ha ojejapipa pe ógare ha sarambikuépe ho’a, oñembyaipaite’.

Jesús he’ipávo ko’ã mba’e, opondera joaite hikuái umi mba’e he’íva. Jesús niko oñe’ẽ karai guasúicha ndaha’éi umi Moise mandamiénto ombo’e vaicha.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

            Oime niko oñepyrũvo peteĩ tembiapo ohenóiva Ñandejára ha Tupãsy, ha he’íva ojapoha opa mba’e hérape. Hesu he’i ndaha’éi niko jajapo haguére Ñandejára rérape iporãta katuete pe jajapóva. Ndaha’éi ñahenói haguére Ñandejára ha sánto kuéra oĩ háicha upe jajapóva ha’étama upe Ñandejára oipotáva. Ikatu niko jajapo upe ñande jajaposévante, jajapo ñande gústo ha ja’e gua’u jajapo hague Ñandejára oipota háicha.

Ikatu avei ñahendu Hesu ñe’ẽ ha jaiporavo umi ñahendusévante, umi nañandepe’a mo’ãiva ñande guatágui, ha ikatúva ñamohenda ñande gústope japyta haguã ñaime háichante. Ha umi Hesu ñe’ẽ ojeruréva ñandéve jaguerova haguã ñande rekove, ñande jepokuaaha, ñasẽ ñane tránkogui katu ñambo’ykénte ha ñañembotavy chugui. Nañahendúi ramo guáicha. Ype apére y. Ohasánte ha ndoikéi.

Mba’épa nde reñandu hína che reindy ha nde che irũ, umi Hesu ñe’ẽ ijetu’u ha nde forsa léntova. Ha mba’etépa umi Hesu ñe’ẽ tekotevẽva ejapysaka porãve emopyenda mbarete haguã nde rekove. Ágã, ama pochy rupi aña ndetyvyro vove, ani haguã ipu’aka nde rehe ha ndereity.

Pa’i Alberto Luna.