Ñahendu Hesu. Viernes 5º Páskua

Escucha el evangelio y la reflexión en: https://youtu.be/uvmtLznVkpg

Viernes 5º Páskua

San Juan 15, 12-17

Jesús oñandúvo oguãhẽmaha ára ha’e ohejávo ko yvy oho haguã túva rendápe, he’i idisípulokuérape: Pe tembiaporã ahejáva peẽme hína, pejoayhu che pohayhuháicha. Pe mborayhu tuichave oñandúva niko hekove jepe ome’ẽ iñirũre. Ha peẽ che irũ hína, pejapórõ
che ha’éva peẽme.

Che niko nda’éi pende rehe peẽ che rembiguaiha. Tembiguái niko ndoikuaái mba’épa ijára ojapo. Che poguereko che irũ ramo, aikuaaukágui peẽme opa mba’e che ru he’i vaekue chéve. Peẽ nda che poravói vaekue chéve.

Che poiporavo va’ekue peẽme. Che pomondóta pejapo haguã heta mba’e iporãva ha hetápe ohupytýva. Péicha, che ru ome’ẽta peẽme opa mba’e pejeruréva chupe che rérape. Upévare, ha’e jey voi peẽme, pejoayhu.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Opaichaguáva ningo ñaime, jaguatáva oñondive ko yvy apére. He’i háicha ñe’ẽ: “Ñande reta ramo en este mundo, opaichaguáva mante ñaime”. Ha péicha avei ojehu ñandéve ñande rógape, ñamba’apo hápe ha ñande comunidad cristiana, ñande grupo ha tupaópe.

Ndajajoporavói, jajotopánte upépe jajeroviáva Ñandejárare. Jako’i ñañembo’e oñondive ha ñamongu’e tembiapo ñamomba’e guasuve haguã Tupãme.

Hesu he’i ndaha’eiha ñande jaiporavóva ichupe. Ha’e hina upe ñande poravo ha ñane renóiva. Ñanembyaty ijehe ha ojapóva ñande hegui iñirũ ha upe jave oñoirũ avei. Ha’e niko upe ñanembojoajúva ñande iglesia-pe. Ha’e upe ñanemoakãva.

Upévare ñande ñasẽ jevy ramo jaiporavo, ñañembyaty umi ñande reheguáva ndive ha ñambo’yke umi ndaha’éiva ñande jepokuaaha, ñamohenda jeýnte ñande gusta háicha ha ñambyaíma Ñandejára rembiapo, jajapo ichugui ñane rembiapo.

Iglesia ndaha’éi aipo ramo pe aty ñande jaiporavóva. Ndaha’éi pa’i oiporavóva ogusta háicha, térã hermana ombyatýva, ndaha’éi karai obispo hénte kuéra, ndaha’éi karai ma’ẽra socio kuéra, térã ña ma’ẽra ohenóiva.

Iglesia ha’e hina Ñandejára rembiporavo oñembyatýva. Umi ohendu vaekue Hesu ñehenói ha oguatáva ambue hapicha ndive, ohendúva avei Ñandejára ñehenói. Upépe opaichagua jajotopa ha ñande ja, ñande jopara.

Hesu he’i ñandéve upe ñande jopara pa’ũme jajoayhu haguã ha’e haguére Ñandejára upe ñanembyatýva ha ñanemopeteĩva. Mborayhu peichagua nosẽi ñande hegui, ndaha’éi ñande ruguýgui osẽva.

Mborayhu peichagua ou hina Ñandejára Espíritugui. Ñañandúgui ha’e ñande rayhuha ikatu ñande avei jahayhu ñane irũ. He’i háicha Hesu: Pejoayhúkena che pohayhu haguéicha. Ha upéva tekotevẽ avei jajerure Tupãme, tajahayhu añete ñande rapichakuérape.

Tajahecha porã umi ha’e ome’ẽvape ñandéve ñane irũrã. Ha upéi che irũ ha che reindy. Epensámapa máva máva hína umi Ñandejára ohenói va’ekue nde ykére ha ome’ẽva ndéve ne irũrã. Mba’eichaitépa ikatúne emoañete hendivekuéra pe Hesu he’íva: Pejoahúkena che pohayhu háicha.

Pa’i Alberto Luna.