Ñahendu Hesu. Viernes IV Durante el Año

Escucha el evangelio y la reflexión en: https://youtu.be/hfW0nsMD-oc

Viernes 4. Durante el Año.

Marcos 6, 14 – 29

Herodes ohendu umi mba’e oje’éva Jesús rehe. Opa rupi niko herakuã. Oĩ he’íva Jesús
rehe, “Péva niko Juan Bautista hína. Opu’ã jeýnteko omanóva apytégui ha upévare
ojapo umi milágro ojapóva.” Oĩ katu he’íva, “Péva niko proféta Elías hína.”

Ha oĩve katu he’íva, “Proféta yma guare niko péva.”

Herodes ohendúvo ko’ã mba’e, he’i: — Juan mante va’erã hína péva, ku añakã’ouka
vaekue ha oikove jey.

Herodes niko omenda va’ekue Herodías rehe, tyvýra Filipo rembirekore ndive. Ha Juan he’i va’ekue chupe, “Ndaikatúi remenda nde ryvy rembirekorére. Péicha ndajajapóiva.”

Upévare Herodes o’apresauka vaekue Juánpe. Herodías niko nda’ija’éiva voínte va’ekue Juan rehe. Ojukase ramo jepe chupe, ndaikatúi, Herodes ndohejáigui chupe. Herodes niko okyhyje vaekue Juángui, oikuaágui kuimba’e marangatuha ha’e.

Hi’ára mbotýpe, Herodes ojapo peteĩ karu guasu hógape. Upépe oho poguasu ha mburuvicha kuéra Galileapegua. Herodías katu ohecha kuaa pe vy’a guasu aja ijáne haguã chupe ikuã cha’ĩ Juan rehe. Ovy’ave jave hikuái, Herodías memby kuña oike ojeroky.

Péva tuicha ombovy’a Heródespe ha umi hendive oĩvape. Ha opavave oguerohorýgui, Herodes osẽ he’i chupe: — Ejerure chéve reipotáva ha ame’ẽta ndéve.

Ha he’i jey-jey chupe ome’ẽtaha chupe ojeruréva, hetã mbytere jepe. Ha oho pe mitakuña oporandu isýpe: — Mba’éiko ikatu ajerure chupe.

He’i chupe isy: — Ejerure chupe Juan Bautista akãngue.

Pe kuñataĩ pya’e ojevy Herodes rendápe, ha he’i chupe: — Aipota eru chéve plátope Juan Bautista akãngue.

Tuicha oguapy Herodes rehe upe ohendúva. Ha nopyrũséigui iñe’ẽre ome’ẽ va’ekue opavave rovake, ojapo mante vaerã pe mitakuña ojeruréva chupe. Upévo, pya’e omondo peteĩ guárdia kárselpe, upéva oñakã’o Juánpe, ha ogueraha iñakãngue plátope Heródespe. Ha’e ome’ẽ upe mitakuñáme ha ha’e ome’ẽ isýpe.

Juan disípulo kuéra ohendúvo Juan ojejuka hague, oho ogueraha hetekue ha oñotỹ.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oĩ niko vy’a porã, jeroky música porã púpe, jekaru oñondive ha jevy’a ka’u’ỹre, py’aguapýpe ha hekópe porã. Oĩ avei farra jeka’urã, musicapu ñanemoakã tarováva, ayvu pararã, sapukái, jeroky háime opívopa, pytũmbýpe, ñanemoakã kuchúva ha ñanemoingéva aña raitýpe, osẽ hágui heta mba’e hendape’ỹva.

Jahecha mburuvicha Herode fárra saingópe, ka’úre ha akã tarováre, he’i he’i’ỹ va’erã ha ojapo ojapo’ỹ va’erã. Aña oisambyhy chupe ojukauka haguã Ñandejára remimbou.

Ñama’ẽ porãke che irũ ha che reindy, umi vy’a japu ñanemoakã tarováva, iporãve voi mbóicha jajere, jajehekýi ha ani jaike pype. Cháke ojelia jepéramo ñande rehe nañande pu’aka véima ñasẽvo chugui oheja mboyve ñande ro’óre ivenéno.

Pa’i Alberto Luna.