Ñahendu Jesús. 17 diciembre: Feria Adviento

Escucha el evangelio y la reflexión en: https://youtu.be/47TZpB8OL-M

17 diciembre: Feria Adviento Mateo 1, 1-17

Ko’ãva hína umi Jesucristo ypykue. Ha’e David ha Abraham ñemoñare va’ekue. Abraham, Isaac ru vaekue; Isaac, Jacob ru ha Jacob katu Judá ha tyvýra kuéra ru. Judá, Fares ha Zérah ru, ha isykuéra Tamar. Fares, Esrom ru; Esrom, Aram ru; Aram, Aminadab ru; Aminadab, Nahasón ru; Nahasón, Salmón ru; Salmón, Booz ru, ha Booz sy Rahab. Booz, Obed ru ha isy katu Rut. Obed, Jesé ru, ha Jesé, mburuvicha guasu David ru. David, Salomón ru ha isy katu Urías rembirekore.

Salomón, Roboam ru va’ekue; Roboam, Abías ru; Abías, Asá ru; Asá, Josafat ru; Josafat, Joram ru; Joram, Ozías ru; Ozías, Jotam ru; Jotam, Ahaz ru ha Ahaz, Ezequías ru. Ezequías, Manasés ru; Manasés, Amón ru; Amón, Josías ru. Josías, Jeconías ha tyvýrakuéra ru.

Upérõ Israelguakuéra ojereraha va’ekue tembiguái ramo Babilóniape. Upe rire, ou vaekue Salatiel, Jeconías ra’y. Ha’e Zorobabel ru vaekue. Zorobabel katu Abihud ru; Abihud, Eliaquim ru; Eliaquim, Azar ru. Azar, Sadoc ru; Sadoc, Aquim ru; Aquim, Eliud ru; Eliud, Eleazar ru; Eleazar, Matán ru; Matán, Jacob ru. Jacob, José ru; ha José María ména. María hína, Jesús hérava Cristo, sy.

Upéicha jajuhu oĩha 14 ñemoñare Abraham guive David peve; ha 14, David guive Israelgua Babilóniape ojereraha peve; ha 14 avei upe guive, ou peve Cristo.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Mitã ra’y oñemoñe’ẽramo niko oñeporandúva jepi mávarepa ha’e osẽ, itúva rupipa térãpa isy rupi. Iporãramo la mitã he’íne itúva: Oreko voi mávarupi osẽ porã haguã péicha. Iñakahatã itereíramo, térã katu hasengy ramo mba’e, he’íne: Aníchene che rehe térã che hénte kuérare mba’e osẽ kóva. Upe ñane reñói ha jakakuaa hague niko he’ise hina. Jaguarete ra’y hovéro jey mante vaerã, he’i voi ningo ñe’ẽ.

San Mateo omombe’u ñandéve Jesús ypykue kuéra. Oñepyrũ voi amo Abrahámgui, oñemosã Rey Davi rehe, oguahẽmeve imátare ha’éva José, María ména.

Kóva niko ojekuaa haguã Jesús ndaha’éiha peteĩ osẽ rei va’ekue upérupinte, ha’eha añete pe tétã Israel ra’y tee. Jahecha avei umi Jesús ipykue apytépe oĩha opaichaguáva.

Oĩ iñarandúva ha itavýva, oĩ imarangatúva ha hekove ky’áva, imánsova ha iñarõva. Ha péicha ningo che reindy ha nde che irũ, Jesús oiko raka’e ñandéichaiténte avei. Oreko ihénte kuéra apytépe opaichagua tapicha, ñande avei jareko háicha ñane héntekuéra apytépe ha ñande rogapýpe. Upéva he’ise hína Ñandejára oiha ñane ndive opáichavo ha ñane moirũha ñandéve avei.

Pa’i Jasy.