Ñahendu Jesús.

Escucha el evangelio y la reflexión en: https://youtu.be/8tqZihzBnn8

Jesús Korasõ Marangatu arete guasu Lucas 15, 3 – 7

Upérõ Jesús omombe’u ko káso umi fariséo ha Moisés léipe ombo’éva: Ja’éntena perekoha 100 ovecha, ha okañy mba’e pende hegui peteĩ. Mba’épa pejapóne. Ndapeheja mo’ãi nga’u piko umi 99, ha pesẽ peheka pe okañy va’ekue. Ágã pejuhúvo, pehupíne pende apére, ha vy’apópe pejevy pende rógape.

Pehenóine pene irũme ha umi pende róga jere rupi oikóvape, “Pejúpy javy’a. Ajuhúma niko pe che ovecha okañy va’ekue.”
Che ha’e peẽme, péicha avei ojehuha yvágape. Tuichave vy’a oiko upépe hína peteĩ heko vaíva oñembojáva Ñandejára rehe, umi 99 heko marangatúvagui rehe, oimémava voi Ñandejára ndive.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Okañy ramo ñande hegui umi ñanerakate’ỹha ningo ñambyasy ha jajepy’apy. Ñañemoĩ jaheka opárupi, ñaporandu opavavépe. Ha ndajajuhúi ramo katu jaguapy ñapensa, ñambojere ñane akãme araka’etépa, moõpa ha mba’éicha rupípa okañýne raka’e ñande hegui.

Jahapykuere reka, jakorre ñama’ẽ opa rupi ha jajerure ñane irũnguéra ha ñande róga guápe toma’ẽ avei ñanendive upe rupi. Ñande képe jepe sapy’ánte ñanemandu’a ñambyasýgui ha jarekose jeýgui ñanendive pe ñanerakate’yha jahayhúva. Ha péicha hagui jaju ramo jajuhu jevy mba’e niko javy’a iterei. Ñasẽ voi ñamombe’u ñane irũ nguéra ha ñande róga guápe. Ha’e kuérama katu ovy’a avei ñanendive ha
oguerohoryete.

Jesús he’i Ñandejára péicha avei oñanduha ipy’ápe peteĩ teĩ umi ita’ýra ha itajýra ha’e ohayhúva okañy ramo ichugui ha heko vaígui oñemomombyry ramo ijykéregui. Ombyasy eterei oñandúvo oñehunditaha umi ha’e ohayhúva, ha ndaikatúi opyta ojepy’apy’ỹre. Oheka mba’éichapa ojuhúta ha ombohapéta ogueru jey haguã ijykére. Ha upévarã niko Ñandejára ojokuái Jesús pe oúva oheka umi okañýva,
jahechápa ndogueru jevýi Ñandejára rendápe, ombovy’a haguã ichupe.

Ko árape ñama’ẽ hína pe Ñandejára Jesucristo korasõ rehe. Ha jahecha oñembokua hague ichugui osaingo ramo guare kurusúre. Ha péva pe Jesús korasõ henyhẽva mborayhúgui ningo, hetaite ohasa asy rire ombogue haguã ñane rembiapo vaikueta, opyta ñandéve guarã ojepe’a, okẽ ramo guáicha. Ijuruvy hína akóinte ñane ra’arõvo jaike haguã ha ñaime hendive.

Ndéve guarã avei che irũ ha che reindy oime ojepe’a hína pe Ñandejára rokẽ. Péicha oheja kuri ndéve guarã Jesús ikorasõ rokẽ, nde rayhúgui noñemboty mo’ãiva reguahẽ meve reike. Ja’e ichupe: Ñandejára Jesucristo korasõ nde rehe ajerovia.

Pa’i Alberto Luna.