Ñahendu Jesús Ñe’ẽ. Domingo 17º Durante el Año
27 julio, 2025Ñahendu Jesús Ñe’ẽ. San Ignacio de Loyola ára
30 julio, 2025
Escucha el evangelio y la reflexión en: https://youtu.be/UaZvAY0DzXo
Miércoles 17º Durante el Año Mateo 13, 44 – 46
Upérõ Jesús he’i opavavépe: Ñandejára Rréino niko ojogua ku pláta yvyguy kokuépe oñeñotỹvape. Pe ojuhúva, oñotỹ jeýnte hendaguépe. Upéi katu, vy’apópe oho ovendepa opa mba’e oguerekóva ha ojogua pe yvy.
Ñandejára Rréino ojogua avei ku ita jeguáre oñemúva oikóvo. Iporãve ha hepyvéva rekávo manté oikóva. Ágã ojuhu vove katu, oho ovendepa opa mba’e oguerekóva ha ou ojogua.
Ñandejára Jesucristo ñe’ẽ
ÑAMBOGUEJY ÑANDE REKOVÉPE
Oĩ niko ohekáva plata yvyguy ha oĩ avei oha’ãva lotería, térã umi víngokuérare ojeporekáva. Opa umíva niko oheka hína amo hapópe pe ikatu va’erã omyenyhẽ hekove vy’águi. Hesu he’i ñandéve jajuhúramo Ñandejárape ha’e hina ku jatopa ramo guáicha pláta yvyguy. Jahecha ramo ichupe, jahayhu ha upévantema voi ñandéve guarã.
Oime ñande rapicha ojotopa va’ekue Jesús ndive ha ovy’aitereíva voi hendive.Ha oikoségui ha’e oiko haguéicha oheja orekomíva guive, ani haguã ojavy pe pláta yvyguy ha’éva ichupe kuerarã pe Ñandejára mborayhu. Roque González de Santa Cruz niko orekopaite kuri oiko haguã ichugui karai guasu. Eguatána Francisco González de Santa Cruz Capitán General Paraguaygua upérõ ityke’ýra. Chikitúnga avei niko oreko paite va’ekue oiko haguã ichugui kuñakarai guasu iválle Villarrica pe. Pa’i Julio César Duarte Ortellado gente kuéra katu amo Caazapápe tuicha ñemuha oreko va’ekue…
Ko’ãvape ogusta rire jeiko porã ha ñeguerochichĩ, oreko paite ipópe péicha oiko haguã. Ha’e kuéra katu noñemosãi mba’etáre, ndojeaposéi mba’e guasúramo. Oheja opa umíva omomba’evégui Ñandejára Jesucristo ha oikoségui ha’e oiko haguéicha. Oñangareko, ohekombo’e ha omoirũ haguã hapichakuéra Ñandejára rapére.
Upéicha ha’ekuéra ovy’a ha péva pe tuichave mba’éva ichupekuérarã. Mba’épa reñandu che reindy ha nde che irũ. Mba’épa ndéve guarã pe pláta yvyguy rejuhusevéva ha reipotavéva ko múndope. Mba’épa ndéveramo guarã upe nembovy’avétava nde rekovépe.
Pa’i Alberto Luna.