Ñahendu Jesús Ñe’ẽ. Domingo 14º Durante el Año

Escucha el evangelio y la reflexión en: https://youtu.be/CZgQoL8LAq8?feature=shared

Domingo 14º Durante el Año Lucas 10, 1-9.

Upérõ Jesús oiporavove 72 idisipulorã ha umívape omondo henonderã, mokõi-mokõi, puebloha rupi hamba’e, umi ha’e ohasataha rupi. He’i chupe kuéra: “Ajépa heta pe kokue ñemitỹngue, omono’õ va’erãnte mbovy. Upévare, pejerure pe kóga járape tombou omono’õ vaerãva. Tapeho peẽ. Peikuaáke pomondoha hína ku ovecháicha jaguaretekuápe. Ani peraha pláta térã pende avíorã térã pende py rehegua ave.

Ani avavépe pemomaitei tapére. Oimérõ pene moguãhẽva hógape, pya’ete pemomaitei pejévo «Ñandejára rérape ta peime porãmba, ha py’a guapy toĩ pene ndive». Ha oiko ramo hikuái py’a guapýpe, pene ñembo’e ohovasáne chupe kuéra. Nahánirirõ katu, peẽme jeýnte opytáne. Ani peiko peva-peva peteĩ ógagui ambuépe. Pepyta upe peguãhẽháme ha pe’u upe oñeme’ẽva peẽme. Omba’apóvape niko ija ohupyty hembiapo repykue.

Peike ramo peteĩ puéblope ha pene moguãhẽ porã ramo hikuái, pe’u umi mba’e oñeme’ẽva peẽme. Pemonguera opa hasýva ha peje chupekuéra Ñandejára Reino hi’aguĩmaha.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Nde rehónte va’erã. Nde reiménte va’erã upépe. He’i ningo lo mitã ojoguerahávo. Ha upéicha vaicha avei Jesús he’i idisípulokuérape ojokuáivo ichupekuéra. Tapeho peẽ, pejeity tapépe. Pe puntéa tembiapo, ani pejepy’apy.

Ñandejára omba’apóta penendive. Ha ñama’ẽramo ñane retã, ñande barrio, ñande ciudad rehe, ñañandu añeteha ko Jesús he’íva: tuicha pe kokue, heta ñande rapicha okañýva, oikomínteva ha heta avei ndoikuaáigui rei oikéva javorái kuápe oñehundi. Mitã, mitãkuña, kuimba’e ha opaichagua ndorekóiva ohekombo’éva chupe. Sa’i oĩ oikóva hapichakuéra ombyaty ha oisãmbyhy Ñandejára rapére. Tekotevẽ, he’i háicha Jesús, jajerure pe kokue járape oĩve haguã ñande rapicha oñanimáva oho pe kokuépe ombyaty umi hi’a isarambipa reíva.

Ha pe tuichave mba’e ikatúva ñande ñame’ẽ niko jaikuaauka Jesús pe. Ikatu haguãicha ñande rapicha hesaitéva oipe’a hokẽ, oipe’a ikorasõ ha hekove Ñandejárape.

Ñande niko, ja’e porãsérõ, ñambohapénte Jesús pe. Nañambyatýi ñanemba’erã. Jesús hína upe omosã ha omboguatátava ichupekuéra.

Nde rehe avei che irũ ha che reindy ikatu porã hína ojevale Ñandejára ejapo haguã ichupe tape ha’e oguahẽ haguã nde rapicha rekovépe ome’ẽvo igrásia marangatu.

ÑAÑEMBO’E OÑONDIVE

Ñandejára Jesucristo, aníkena eheja ore nde Iglesia guáva roiko ñembotypy. Torosẽ uvei romosã haguã ndéve heta tapicha, Nde eisãmbyhy haguã ichupe kuéra ne mborayhúpe. Amén.

Pa’i Alberto Luna.