Ñahendu Jesús. Domingo 3º Adviento

Escucha el evangelio y la reflexión en: https://youtu.be/itNmVxnZcXw

Domingo 3° Adviento Ciclo A Mateo 11, 2 – 11

Upérõ Juan Bautísta oĩva kárselpe, ohendu umi mba’e Cristo ojapóva. Upémarõ omondo idisípulokuéra apytégui Jesús rendápe. Ha’e kuéra oporandu chupe: – Nde piko hína pe Juan he’i vaekue outaha, térãpa roha’arõ vaerã ambuépe?

Jesús he’i chupekuéra: – Tapeho peje Juánpe ko’ã mba’e peẽ pehecháva ha pehendúva peína. Pemombe’u chupe ohecha’ỹva ohecha jeyha, paralítiko oguata porãha, lepróso okueraha, ohendu’ỹva ohendu jeyha, omanóva oikove jeyha ha imboriahúvape oñehendukaha marandu porã. Ha ovy’aiténe umi norrenegáiva che rehe che kuaa rire.

Juan remimbo’ekuéra ohokuévo, Jesús oñepyrũ oñe’ẽ hese opavavépe, ha he’i: – Peẽ pesẽ ramo guare peho desiértope, mba’e pehecha haguãpa peho ra’e. Pehechápa ra’e takuára yvytu ombovaváva.

Nahániri. Maerã aipo ramo peho. Pehópa pehecha peteĩ kuimba’e oñemonde jeguapávapa. Peẽ niko peikuaa porã umi oñemonde jeguáva oikoha mburuvicha guasu kuéra rógapente. Amo ipahápe, mba’e aipo ramo pesẽ pehecha. Peteĩ profétape, ajépa. Upéicha añete. Ha pejuhu peteĩ mba’e guasuvéva profétagui katu. Juan rehe niko Ñandejára Ñe’ẽme he’i: “Che amondo che ñe’ẽ rerahaha ne renonderã, ombosako’i haguã ndéve nde raperã.”

Añetehápe ha’e peẽme, ndaipóri yvypóra kuéra apytépe mba’e guasuvéva Juan Bautístagui. Opáichavo, pe michĩvéva Ñandejára Reino pe, upéva mba’e guasuve chugui.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Heta mba’e niko jahecha ha ñahendu Ñandejára rehegua ko Navidad oguahẽ mbotápe ha heta mba’e avei hyapu ha opararã ndaha’éiva Ñandejára rehegua. Oñemomýiva ha ojejapóva Navidad rérape, ndaha’éiva hína oñemomorã haguã Ñandejára Jesucristo jeju ñande apytépe.

Umi mba’eta apytépe ñande avei ikatu jaguapy ha ñapensa mba’épa añetehápe upe Navidad ha mamópa jajuhúta
Ñandejárape tyapu ha pararã pa’ũme.

Juan Bautista niko ohendu avei raka’e heta ñe’ẽ oguahẽva ichupe Jesús rehegua, ha okañy imi avei raka’e ha’e. Ha oikuaa porãsegui Jesús pa añete pe Ñandejára remimbou térãpa oje’énte hese upéva, omondo iñirũ nguérape oporandu haguã ichupete voi. Jesús he’iuka ichupe: Tapeho pemombe’u Juan Bautista amongueraha hasýva ha imboriahúvape amoguahẽ Ñandejára mborayhu ha jehovasa.

Ha mba’épa Jesús he’íne ñandéve avei ñaporandúramo ichupe mba’éichapa ikatu ñande jaikuaa ha jajuhu ichupe ko Navidad rapére jahávo. Ñapensamína che irũ ha nde che reindy moõpa ikatu jajuhu Ñandejárape. Ani ágã ojehasa rei ete ñande hegui ko Navidad peteĩ ka’u ko’ẽme ha okañy ñande hegui Jesús rapykuere.

ÑAÑEMBO’E OÑONDIVE

Ñandejára ore Ru, emboúva hína nde ra’y Jesús onase haguã mboriahu pa’ũme ha ñeikotevẽ apytépe. Ehechaukamína oréve mba’eichaitépa ikatu añetehápe rojuhu ichupe ko Navidad pe. Amén.

Pa’i Jasy.