Ñahendu Jesús. Domingo 3º Tiempo Durante el Año

Escucha el evangelio y la reflexión en: https://youtu.be/zoaDloLs2VM?si=aoOMo–CzW17xFx7

Domingo 3º. Durante el Año.

Marcos 1, 14 – 20

Juan ojeapresa rire, Jesús oho Galiléape omyerakuã haguã Tupã marandu porã.

He’i: “Oguahẽma upe ára oje’eva’ekue, ha Ñandejára Rréino hi’aguĩma. Pejevy Tupã gotyo ha perovia pe marandu porã.”

Jesús ohasa jave ohóvo mar Galiléa rembe’y rupi, ohecha Simón ha ityvýra Andréspe. Ha’ekuéra niko peskádor, ha oityhína hikuái rréd ýpe.

Jesús he’i chupekuéra: – Peju che moirũ, ha che pombo’éta pejura haguã pende rapichápe.

Upepete voi oheja hikuái umi rréd, ha oho hendive. Ha Jesús ohovévo upégui, ohecha Zebedeo ra’ykuérape, Santiago ha ityvýra Juánpe, omyatyrõvahína umi irrédkuéra ikanóape. Upépe voi ohenói chupekuéra, ha ha’ekuéra oheja itúva Zebedeo ha ipytyvõhakuéra ikanóape, ha oho Jesús ndive.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Túva, sy, mbo’ehára ikatupyrýva niko ombo’e mitãme ha ohechauka hembiaporã ipyahuvévape. Ojapouka ichupe umi ndoikuaáiva ha ombokatupyry ãga upéi ijehegui haguã hikuái.

Umi ojapopáva mitãme hembiapo, nombo’éiva chupe, ombolaja vai ha ojapo chugui tapicha pituva, arriero ha kuña paranada oje’eha.

Juan Bautista niko ohekombo’e heta upéi oiko va’ekuépe Jesús disípulo. Oñemoñe’ẽ ha omongarai Jesús pe avei, ha upéicha ha’e oipe’a tape umívape.

Oguahẽvo upe ára ha’e ohoha préso ha upéi ojejuka hague, oĩmbaitéma hekoviarã omboguatáva Ñandejára rembipota. Ha upérõ avei Jesús oñandu omoñepyrũva’erãha hembiapo.

Ha Juan ojapo haguéicha, Jesús avei oñepyrũ ohenói iñirũrã, Andrés ha Simón, ha uperiremínte ohenói Juan ha Santiago, Zebedeo ra’ýva mokõi avei. Ijúntare voi ogueru Jesús, mokõi mokõi oñapytĩ Ñandejára júgo guýpe, ha’e ohekombo’e ha ombokatupyry haguã Ñandejára kokuépe. Opyta haguã hekoviarã.

Ha ou hendive hikuái. He’i háicha Emiliano purahéi: “Taheja che ru, che sy, taheja opa ahejáva, ko che retã rayhupápe tamano jepe che ave”. Ha upeicha ja’éramo ñane retã ñehenóime niko tuichave ñanderetia’eva’erã Ñandejára ñanerenói jave.

ÑAÑEMBO’E OÑONDIVE

Ñandejára Jesucristo, nde reipotágui nde py’aite guive Ñandejára Reino oguahẽ, ehenóiva’ekue ne irũrã ha ehejava’ekue ichupekuéra nde rekoviarã. Oremokyre’ỹ oréve avei, rohendúvo Nde ore renói torojepoi nendive tembiapópe, taoreaty opavave nde rehenóiva ndive, romba’apo haguã Ñandejára Reino ou haguã ore apytépe. Amén.

Pa’i Jasy.