Ñahendu Jesús. Jesucristo rete ára

Escucha el evangelio y la reflexión en: https://youtu.be/7HvbsXYEkXU

Jesucristo rete ára. Ciclo C. Lucas 9, 11b – 17

Umi árape heta ijaty ha oguahẽ Jesús rendápe. Upépe ha’e oñe’ẽ chupekuéra Ñandejára Rréino rehe, ha upéi ave omonguera hasývape. Ka’aruetévoma katu, umi 12 apóstol oñemboja Jesús rendápe, ha he’i chupe: — Iporã vaerã niko remondopa ramo ko’ã genteta puebloha rupi. Upe rupi toho toheka oke haguã ha ho’u vaerã. Árupi niko ndaipóri mba’eve.

Jesús he’i chupe kuéra: — Peẽna pemongaru ichupekuéra.

He’i hikuái: — Mba’éichata piko péva, ko 5 pan ha mokõi piránte jarekóva. Ndorohói mba’érõ rojogua niko nañamongaru mo’ãi opavavépe.

Oĩ niko upépe amo 5.000 kuimba’e rupi. Jesús he’i idisípulo kuérape upémarõ: — Pemboguapy oñondive 50 rupi, aty-atýpe. Ha péicha ojapo hikuái. Upéi katu Jesús ohupi umi 5 pan ha mokõi pira, oma’ẽvo yvága gotyo ohovasa, omboja’o ha upéi ombohasa idisípulokuérape ome’ẽ haguã opavavépe.

Hetakue ho’u hikuái hyvatã meve. Hembývagui katu omono’õ hikuái 12 ajaka renyhẽ.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE

Orémo he’i karai Pa’i misa hápe ha nañanekonvidái. Ndaipóri peẽmo. He’i ningo lo mitã otalláramo Pa’ikuérare. Ha’ekuérante ho’upa la víno ha nombohasái. He’i lo mitã. Ko árape niko ñanemandu’a hína Corpus Christi ára. Péva ha’e Ñandejára rete ára, oñeme’ẽva ñandéve misa hápe.

Upéva jajapo hína ñaromandu’ávo Jesús ojapo va’ekue omano mboyve ha ohejáva ñandéve jajapo haguã ñanemandu’ávo hese. Ñahendu angete mba’éichapa Jesús omoguahẽ oikotevẽvape, ombo’e ha oñemoñe’ẽ ichupekuéra. Oñembo’e hese kuéra ha oipohano umi hasývape. Ha ka’aru pytũmaramo idisípulo kuéra he’i chupe omondo haguã upégui umi ijatývape ojeheka haguã upérupi.
Ha’ete ku he’íva Jesús pe, japytántena “oremo”, ja’u la jarekomíva ha tohopa hikuái.

Jesús katu he’i: Pemongaru peẽ ichupekuéra. Tesaparápe ojecha apóstolkuéra. Ñande avei niko oúramo ñandéve umi mboriahu atýra, hasýva, oikotevẽva, oiméne ñanemondýita avei. Moõgui piko ñanohẽta ñamongaru térã ñaipohano haguã.

Ja’éta avei he’i haguéicha umi Jesús disípulokuéra: Eréna chupekuéra toho tojeheka. Toho hospitálpe, municipalidad, gobernaciónpe. Tojerure político ha empresariokuérape mba’e. Mba’éiko ñande jajapóta ko mba’éve nunga ave ndajarekóiva. Ha nde ave oiméne repensa sapy’ánte mba’eveteha upe erekóva ha ikatúva ejapo.

Jesús he’i ndéve ndaupéichai. Mba’eve nde’iséi ereko heta térãpa sa’i, nde pláta heta térãpa nde sogue, upe he’iséva hína ehechakuaa nde rapichápe ha ani eñembotavy chugui.

ÑAÑEMBO’E OÑONDIVE

Ñandejára Jesucristo, rehechakuaáva tapicha mboriahu iñembyahýivape. Aníkena eheja romboty ore korasõ ore rapicha oikotevẽva renondépe. Amén.

Pa’i Alberto Luna, SJ.