Ñahendu Jesús Ñe’ẽ. Jueves 5º Pascua

Escucha el evangelio y la reflexión en: https://youtu.be/N4RFZg6-pcQ

JUEVES 5º PASCUA San Juan 15, 9-11

Jesús oñandúvo oguãhẽmaha ára ha’e ohejávo ko yvy oho haguã túva rendápe, he’i idisípulokuérape: Che pohayhu peẽme, che ru che rayhuháicha chéve. Peiko kena mborayhúpe, pe mborayhu pende rehe añandúvape. Pejapo ramo che rembipota, peikóta pe mborayhúpe pende rehe añandúvape. Péicha avei che, ajapóvo che ru rembipota, aiko pe imborayhu ha’e che rehe oñandúvape.

Añe’ẽ niko peẽme kóicha pevy’a haguã che ndive, ha pene renyhẽ haguã vy’águi.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Jaikosete ningo mborayhúpe. Hi’ãnte ñaime umi jahayhúva ndive ha ñañandu jajehayhuha avei ñande. Ndajaikoséi niko pochy ha tovapukúpe, ñorairõ ha jeja’ópe. Upéva rangue hi’ãnte ñandéve opavave ndive ñande rory, ñañemongeta porã, ñande py’a porã ha
javy’a oñondive. Ñande niko jaikuaa jepe ndaha’éiha opavave rehe ñañandu mborayhu peichagua.

Oiménte jahayhúva ha heta oime mba’everõ guáicha, ndoúi ni ndohóiva ñandéve. Ha oime avei ndajahayhúiva, ndajaikuaaséiva voi chugui mba’eve, nañandea’éiva ha ndajahechaséiva voi. Umi jahayhúva ñambojerovia, ñambojere, jaheka ha ñamoñe’ẽmba. Ha umi ndajahayhúiva katu ijetu’u ñandéve ñaime haguã ijykére jepe.

Jesús he’i ñande rayhuha ñandéve ha he’i avei ñandéve jaiko haguã imborayhúpe, pe mborayhu ha’e oñandúva ñande rehe. Ha ñande niko ndaikatúi ñañandu chupe ñañandu háicha ñande rapicha jahayhúvape. Ndaikatúi jaipopyhy, jaguapy ijykére, ñaañua…

Mba’eichaguátapa aipo ramo upe mborayhu ha’e oñandúva ñande rehe ha ñande ikatúva ñañandu hese.

Ndaha’éi hína mborayhu opytáva ñane remiandu ha ñande py’ápente. Upéva pe mborayhu oho mombyryve ha ipypukuve hina pévagui. Péva pe Jesús mborayhu ñañandu ramo niko jajapo upe jahayhúva oipotáva, ñame’ẽ upe jahayhúva oikotevẽva, upe ombovy’átava ichupe.

Jesús he’i oipotaha ñañandu pe imborayhu añete ñanembovy’a ha ñanemyenyhẽva vy’águi. Ha upéva upe mborayhu ha’e ñanembo’e ojapóvo iTúva Ñandejára rembipota. Pe vy’a ijapyra’ỹva rape ndaha’éi jajapo upe ñanembovy’áva ñandévente, ndaha’éi ñamoĩ tenonderã ñande gústo ha ñande kapríchonte. Pe vy’a añete oguahẽ ñande rekovépe jajapóvo upe ombovy’áva Jesús pe.

Oimépa nde che irũ ha che reindy umi nde rehayhúva. Oimépa umi nde rayhúva ndéve. Mba’épa reñandu upe nembovy’avéva umi nde rehehayhúva ndive. Mba’éichapa ikatúne eñandu upe Jesús mborayhu hendive kuéra.

Pa’i Alberto Luna.