Ñahendu Jesús. Lunes 2º Pascua
25 abril, 2022Ñahendu Jesús. Chiquitunga ára
28 abril, 2022
Escucha el evangelio y la reflexión en: https://youtu.be/FVyB-hS3saw
MIERCOLES 2º PASCUA San Juan 3, 16-21
Upérõ Jesús he’i: Ñandejára ohayhu etereígui opa yvypórape, ome’ẽ vaekue ta’ýra peteĩete, ani haguã omano umi hese ojeroviáva, oikove haguã uvei opa ára. Ñandejára niko nomboúi ta’ýra yvy ári ohundi haguã yvypórape. Ombou chupe, ha’e rupi yvypóra ojesalva
haguã.
Pe ojeroviáva Ñandejára Ra’ýre noñehundi mo’ãi. Pe ojerovia’ỹva katu oñehundíma, ojerovia’ỹ haguére Ñandejára Ra’ýre. Kóicha niko oñehundi umi ojerovia’ỹva: Che aju ko yvy ári ahesape haguã opavavépe ha yvypóra kuéra hembiapo vaígui, oikoseve pytũmbýpe.
Opa hembiapo vaíva niko ndoikoséi hesakãháme. Pytũmbýpente oikose, ha noñemo’aguĩséi hesakãháme ani haguã ojehecha hembiapo vaikue. Umi oikóva Ñandejára oipotaháicha katu oñemo’aguĩ hesakãháme ojehecha haguã hesekuéra oikoha Ñandejára oipotaháicha.
Ñandejára Jesucristo Ñe’ẽ.
ÑAMBOGUEJY ÑANDE REKOVÉPE
Heta jehasa asy, mboriahu, mba’asy, tekotevẽ, vy’a’ỹ, jejopy vai jahasáva ñande rekovépe, ñane retãme, oiméramo jepe he’íva Ñandejára ombouha ñande ári ñanerembiapo vai haguére, ñande jaikuaa ndaupéichaiha. Jesús he’i Ñandejára ñande rayhúgui ombou hague ita’ýra. Ha ha’e ndoúi hague ñanerundi haguã, ñande salva haguã uvei ou.
Ñande voi niko jagueru ñande ári heta jehasa asy. Ñanerembiapo vaikuénte ojere ñande apére, térã katu ñande rapicha rembiapo vai ñande rapy. Ñandénte, ñañemomombyrýgui Ñandejáragui, ha ñane añágui oñondive, ñahundi upekuévo ñande yvy, ñande y, ka’aguy, pira ha mymba kuéra. Jajatapy ojuehe ha ñahatapyña tata jakái hápe hína ñande ha ñande rekoha, ñande róga guasu.
Ñandejára ndoipotái jakái ha ñañehundi. Ndoipotái oñehundi ko ñane múndo porãite ha’e oheja vaekue ñandéve ñañangareko ha ñamoporãve haguã. Jesús ou ñande pe’a upe tatágui, oipota ñasẽ hesakãháme. Jaiporavo hendive ha ñande rapichakuéra ndive pe tekove añeteguáva. Ani ñande taryrýigui japyta pytũmbýpe.
Mba’épa rehecha che irũ ha nde che reindy umi mba’e iñypytũva nde rekovépe, tekotevẽva emyesakã. Mba’éichapa ikatúne esẽve ehóvo pe hesakãháme Jesús nde resape haguãme igrásia porãite reheve.
Pa’i Alberto Luna.