Ñahendu Jesús. Miércoles 4º Tiempo Durante el Año

Escucha el evangelio y la reflexión en: https://youtu.be/5Ha5TLtFOOs

Miércoles 4º Tiempo Durante el Año Marcos 6, 1 – 6

Jesús oho Nazarétpe, iválle okakuaa haguépe. Ha idisípulokuéra oho hendive. Ha oguãhẽvo pytu’uha ára, oñepyrũ ombo’e tupaópe. Ha umi ohendúva Jesúspe, ijurujaipa opytávo ha he’i joa:— Mba’éicha haguã piko oikuaa ko’ã mba’e. Mba’éicha rupi piko peichaite iñarandu,
ha ojapo umi milágro ojapóva. Ndaha’éi nga’u piko kóva ku carpintéro María memby.

Tyvýra niko Santiágo, José, Judas ha Simón. Ha jaikuaapa niko máva-mávapa heindy.

Ha ipochypa hikuái hendive. Jesús katu he’i chupe kuéra: — Opa rupi niko profétakuéra oñemomba’e. Hógape, hogagua apytépe ha ivállepe katu nahániri. Ha upépe ndaikatúi ojapo heta milágro. Mbovymi hasývarente omoĩ ipo ha omonguera. Ha opondera Jesús umi upepegua ndojeroviaiha hese.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oĩ niko ñande rapicha ijestudio hetáva, doctor, doctora, licenciado, licenciada. Orekopáva título kuatiáre omoĩva tápiare ojekuaa haguã mba’e guasuha.

Opáichavo ñande jaikuaa hina ndaha’éi pe libro guasu térã universidad ojapóva mávagui karai guasu térã kuñakarai guasu. Oime niko añete oiporúva pe oikuaáva oipytyvõ haguã hapichápe, ha oime oiporúva imba’e kuaa oporombotavy porãve haguã ha ijupe guarãnte ohekáva.

Umi Jesús vallegua ohecha ramo mba’éichapa ha’e iñarandu ha oñe’ẽkuaa, ndaipórigui ivállepe mamópa ostudiáta oñemoarandu eterei haguã. Pe arandu ha pe ñe’ẽ porã Jesús orekóva niko Tupã Ñandejára remime’ẽ oúva Espíritu Santo rupive.

Jesús niko añete, ndaijestúdio pukúi ramo jepe, imaéstra porãmi va’ekue. Eguatamína hína, Tupasỹnteko la imaéstra ha la imaéstro katu Señor San José. Mba’épa reipotave che irũ. Pe ñande rógante voi hína che reindy la escuela tuichavéva.

Jahecha ave pe jerovia ñande rapicha ñandéicha guáre tuicha mba’eha. Omombe’u ñandéve San Marco Jesús ndaikatúi hague ojapo mba’eve guasu ivállepe, ndojeroviáigui hese umi oikuaa porãva ichupe. Ni cinco nome’ẽi hese hikuái.

Ñañeporandumína oimépa ñande jajerovia añete ñande rapicháre. Umi ñandéicha guáva rupive niko Ñandejára ojevalese omoguahẽ haguã ñandéve igrásia.

Ani ágã oiko ñande rehe oiko vaekue Jesús válle guáre, ndojeroviáigui hapicháre ojavy umi mba’e porã Ñandejára ome’ẽse va’ekue ichupekuéra.

Pa’i Jasy.