Ñahendu Jesús Ñe’ẽ. Domingo 28º Durante el Año

Escucha el evangelio y la reflexión en: https://youtu.be/xM5UjChlVnc?feature=shared

Domingo 28 Durante el Año Ciclo C Lucas 17, 11 – 19

Jesús ohóvo Jerusalénpe, ohasa Samaria ha Galiléa ojoajuha rupi. Ha og̃uahẽvo peteĩ pueblo’ípe osẽ ohuvãitĩvo chupe 10 lepróso. Mombyrymi opyta hikuái Jesúsgui, ha osapukái chupe: — Jesús, mbo’ehára. Ore poriahuverekomína.

Ha ohechávo chupe kuéra, Jesús osẽ he’i: — Tapeho pejechauka pa’ípe.

Ha oguata jave ohóvo, okuera hikuái. Ha peteĩ, ohecha kuaávo okueraha, ojevy Jesús rendápe ha oguerohory oúvo Ñandejárape. Oho oñesũ Jesús renondépe omboja peve isyva yvýre, ha oagradese chupe. Samariagua nimbo ra’e ha’e.

Jesús osẽ he’i hemimbo’ekuérape:— Ndaha’éi nga’u piko ra’e 10 umi okuera va’ekue. Moõiko ohopa hikuái. Ha mba’eichakue piko ko mombyryguávante pe oguerohorýva Ñandejárape.

Ha ojere he’i pe kuimba’épe: — Epu’ã tereho. Che rehe rejerovia haguére rekuera.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

“Llena el alma de suspiro asegíta che rape, adios che vy’a hague, adios lugar preferido. Oguahẽ el tiempo cumplido rohejávo katuete, ndahaséiramo jepe, el destino che obliga”. He’i Emiliano. Ha pevaite oiméne oñandu raka’e Jesús ohóvo Jerusalénpe.

Oheja upe oime porãha ha oike ijetu’uhápe. Oguahẽ el tiempo cumplido. Jerusalénpe oha’arõ hína ichupe irokuete, ohupíta kurusu. Hakúramo jepe la yvy Jesús ndopytái ivy’a haguépente. Oho hese ha ndoguevíri.

Ha heta tapicha ndive ojuasa ohóvo tapére. Ndaha’éiko Jesús año la ojejopýva. Umi 10 leproso osẽva haperãme oiko asy avei. Hasy katu vai ha naipohãi, avave ndojái hesekuéra, ojere ichugui kuéra la gente. Ojeguaru voi katu ichugui kuéra ja’e porãsérõ. Jesús
katu oñemboja, oñemongeta porã ha oñembo’e hese kuéra oipohãno haguã.

Ko’ãga ningo umi leproso oñepohãnóma ha oikóma ñande apytépe mba’evérõ guáicha. Opaichavo oime gueteri heta tapicha ñande apytépe avave ndoikuaaséiva ichuguikuéra mba’eve. Ramoite umi Corona virus orekóvagui ñañemomombyry va’ekue.

SIDA orekóva katu oñeguerotĩ ha ojekyhyje voi. Mombyrymíguinte oñema’ẽ. Ha oime avei ñande rapicha ndojehecha porãi ha ojedepresiáva ndaha’éi ramo jepe mba’asy upe orekóva.

Umíva hína umi travesti, homosexual ha lesbiana oñehenóiva. Ojejahéiva sapy’ánte, ha heta oime oñembohorýva hesekuéra ndaha’éiramo guáicha ñande rapicha.

Ndépa ere che reindy ha che irũ, umíva oñembojáramo Jesús rehe ha’e omoguahẽne ha ohendúne haguã ichupekuéra. He’i ningo Papa Francisco: “Máva piko che akondena haguã peteĩ tapicha gay térã lesbiana ojerovia ramo Ñandejárare ha oguataséramo hendive”.

ÑAÑEMBO’E OÑONDIVE

Ñandejára Jesucristo, nde emoguahẽva porãva opavave nerendápe oúvape. Orembo’emi ore avei rohayhukuaa haguã ore rapicha ha ani avavépe romboyke. Amén.

Pa’i Jasy.