Ñahendu Jesús Ñe’ẽ. Lunes 1º Pascua

Escucha el evangelio y la reflexión en: https://youtu.be/vS8IRfY5QoY

Lunes 1º Páskua Mateo 28, 8 – 15

Upérõ kyhyjepópe ha tuicha vy’a reheve avei, umi kuña pya’e osẽ pe itakuágui ha oho omombe’u umi Jesús disípulokuérape oikove jeýma hague. Peichaháguinte, Jesús osẽ sapy’a haperãme, ha omomaitei chupekuéra.

Oñemboja hikuái Jesús rendápe, oañuã ipy ha oñesũ henondépe. Jesús he’i chupekuéra: — Anivéma pekyhyje. Tapeho peje che irũ nguérape toho Galiléape. Upépe che recháta hikuái.

Umi kuña oho aja Jesús disípulo rekávo, oĩ avei soldádo ohóva pa’i kuéra rendápe. Oho omombe’u mba’e-mba’épa ohecha hikuái. Umi pa’i katu osẽ oho mburuvichakuéra rendápe, ha oñemoĩ peteĩ ñe’ẽme ombopopeguávo umi soldádope ani haguã omombe’u mba’eve.

He’i chupekuéra: — Pejéta peke aja pyhare, ou hague Jesús disípulokuéra ha omonda hague hetekue. Ha peichahágui Pilato oikuaa mba’e ramo, ore roñomongetáta hendive. Pende rehe avave nde’i mo’ãi mba’eve.

Umi soldádo osẽ oho pláta ipópe, ha ojapo pa’ikuéra he’i haguéicha chupekuéra. Ha ko’agãite peve hudíokuéra apytépe oje’e péicha ojehu hague.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Jahecha ningo oime ramo ihénte manóva kuñanguéra umi ojerevéva jepi pe omanóvare ha upéi ohóva omopotĩ oñeñotỹ hague, oraha yvoty, omyataindy ha oñembo’e. Péina jahecha umi kuña nguérape oiko va’ekue Jesús disípulokuéra apytépe oho oñembo’e Jesús oñeñoty haguépe. Ha ichupekuéra Jesús ojechauka tenonderã oikove jevy rire.Ha ojevale umi kuñanguéra rehe oho haguã umi apóstol ha disípulokuéra rendápe omombe’úvo Ñandejára omoingove jey hague Jesús pe.

Jesús oúta ramo guare yvy ári niko ánhel Graviel omombe’u peteĩ kuñáme, ha’éva Tupãsy María, ha oikuaauka avei Isabélpe. Ha oikove jevy rire, ánhel peteĩva omombe’u raẽ ko’ã kuñáme oikuaauka haguã umi kuimba’épe. Ha ñahendu angete Jesúsete voi ohuguaitĩ hague ichupekuéra vy’apópe.

Pe ñande Iglésiape kuñanguéra, sy, aguéla, ñane reindy, tembireko, tajýrakuéra hína umi opunteáva jepi ñandéve ñembo’e, ha jerovia rape. Heta mitãkuña, kuñakarai, sy, pyahu ha guaiguĩ, omosã jerovia, ñembo’e, tupao rayhu. Ñande rovasa ha omopyenda mbarete ñande róga ha ñane comunidakuéra. Jesús ojevale hese kuéra ohechauka haguã ha’e oikoveha añete, oĩha ñande apytépe, ha ñanemoirũha ñande guatápe.

Ne mandu’ápa hína che irũ ha che reindy mávapa nembo’e va’ekue eñembo’e haguã. Mávapa nde rovasa ha oiko nde reheve eho haguã tupaópe, eikuaave haguã Ñandejára rape. Iporã jahechakuaa ha jahecha ramo umi kuñanguérape. Jagradese ichupekuéra. Ha’ekuéra ko ñande Iglésia máta mbarete hína, ha Jesús ojapo ichupekuéra mba’e guasu ramo.

Pa’i Alberto Luna.