Ñahendu Jesús Ñe’ẽ. Martes 30º Durante el Año

Escucha el evangelio y la reflexión en: https://youtu.be/1SXsAboxDTk?si=2kJUDG2sP1iZkfXA

Martes 30 Durante el Año Lucas 13, 18 – 21

Upérõ Jesús omombe’u kóva ko káso: Mba’éicha tamo ra’e amombe’u peẽme mba’épepa ojogua Ñandejára Rréino. Ojogua ku mostása ra’ỹime kokuépe ñañotỹva. Heñói ha opu’ã, ha ijyvate ñaimo’ã yvyra máta. Upéi, guyrakuéra jepe ou ojaitypo hakãre.

Jesús omoĩ avei kóva ko káso: Mba’e rehépa ikatu ñambojoja Ñandejára Rréino. Ojogua ku levadúrape peteĩ kuñakarai ombojehe’áva 25 kílo rupi arína reheve, ipahápe oúva ombovu paite.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Umi judíokuéra Jesús javegua ningo oha’arõ oguahẽ pe Ñandejára Reino yvy ári. Ha’ekuéra oimo’ã kuri Ñandejára oguejýtaha yvágagui tuicha pu’aka reheve ha omoĩtaha peteĩ mburuvicha guasu, ohundipáva mbaretépe ikontrário, ha ohupi va’erãva yvate tetã Israel, omosẽmba rire rrománokuérape, orekóva hetãnguéra ipoguýpe. Ha péina ko ou Jesús ha ombojoja upe Ñandejára Reino peteĩ mostása ra’ỹire, ha’éva hina umi yvyra ra’ỹi apytépe michĩvéva, kýto ra’ymi, háime ndojekuaáiva. Ha okakuaa rire katu oiko chugui peteĩ yvyra rusu, ndaha’éi voi yvyra máta guasu mba’e.

Opáichavo hakã porãma ojaitypo haguã hoguekuápe hetáichagua guyra. Upéicha Jesús ñanembo’e ani haguã ñaimo’ã Ñandejára oguejytaha yvágagui, tuicha tyapu ha mimbipápe. Ha’e niko oĩma ñande apytépe ha ndaha’éi tuicha háicha ojehechaukáva.

Omba’apo upe levadúraicha, michĩ ramo jepe ombovupáva upe mása tuichakue. Térã katu upe kuáhoicha, jajapo haguã kesu ñamoĩva kambýpe. Peteĩ pehenguemínte jaity ipype ha upévape hypy’apáma.

Jesús he’i ñandéve Ñandejára omba’apoha kirirĩ hapemínte. Umi ñanerembiapo sa’i sa’i rupive. Oñeñandu’ỹ ha ndahapykueréi vaicha rupive niko Ñandejára ojapo ohóvo hembiapo ohupyty va’erãva hetavépe. Ani ñane kangy térã ñande py’a mano ndajahecháiramo tuicha mba’e hechapyrãva ñande rapykuerépe. Ani ñaimo’ã Ñandejára hesaraiha ñande hegui mba’e.

Jerovia ha mborayhu pópe ejapóva guive ko ndaha’éi hína vyrorei. Michĩramo jepe upe ehupytýva, che reindy ha nde che irũ. Ha neremboapu’áiramo guáicha mba’eve, ejerovia añete hápe Ñandejára onohẽne haguã, upe michimi nde py’aite guive ejapóvagui, tuichave mba’e hetápe oipytyvõ ha ohovasa va’erã gueteri.

Pa’i Jasy.